Shillong, Naiwieng 25 : Ki nongïalehkai kickboxing na ka jylla Meghalaya kiba don hapoh ka shatri jong ka Meghalaya Association of Kickboxing ki la ïoh khur 45 tylli ki takma ha ka National Kickboxing Championship 2025 kaba la long ha Pune naduh ka 20 tarik haduh ka 23 tarik u Naiwieng, 2025.
Kane ka kynhun ïalehkai ba la lamkhmat da u Bah Donny R. Ranee kum u Grandmaster uba dei ruh u President jong ka MAKO bad u Bah Baremdor Kharmuti kum u General Secretary ka la phah 12 ngut ki nongïalehkai ba kynthup ïa ki 7 ngut ki shynrang bad 5 ngut ki kynthei.
Kane ka kynhun ka la ïoh khur 31 tylli ki takma ksiar, 7 tylli ki takma rupa bad 7 tylli ki takma rnong bad ïohrah ruh ïa ka kyrdan kaba saw napdeng ki 20 tylli ki jylla kiba ïashim bynta ha kane ka lympung ïalehkai.
