Shillong, Naiwieng 23 : U Nongïalam ka Seng Congress ha kane ka jylla u ma Vincent H Pala u la kynthoh pyrshah ïa ka VPP kaba ïalam ïa ka jingsynshar ha KHADC da kaba ong ba ki rukom treikam jongka ki la pynduh jingkyrmen ïa ki paid nongkyrshan jongka bad la jur sa tang ka jingïakynad hapoh ka party namar bym lah ban pyntreikam ïa ki jingkular ïa ki paidbah ha ka por election.
“ Na kaei kaba nga ïohi kam long kumba ki briew ki khmih lynti. Ka BJP bad NPP ki lah ban khlaiñ ha ka jingïadie ïathied kulai hynrei kine ki jingïakynad hapoh ka VPP shen kin sa pynngiah ïa ki paidbah ki tang shu paw pyrthei” ong u ma Pala.
Une u Nongïalam ka Congress uba dei u MP ba rim u la ïathuh ba u la ïoh pdiang ïa ki jingtyrwa na kiba bun ki VPP ba ki kwah ban pynïasoh noh sha ka Congress namar kim sngewtynnad shuh ban don ha ka VPP.
“ Ki ïohi bad sngew ba ki rukom treikam ka VPP kim dei satia kumba ki khmih lynti bad thrang” ong u ma Pala.
U la ong shuh shuh “ Ka lah ban long ba kim pat long kiba shemphang hynrei lada don ka jingkitkhlieh dei ban don ruh ki nongaibuit kiba la shemphang. Ki don da ki spah ngut kiba kloi ban ïalam ïa ki, hynrei ban shu ong ba ngim pat shemphang hadien ba la synshar la lai bnai kam long kaba lah ban pdiang. Ki dei ban wad bad it bniah bha ïalade”.
Halor ka Professional Tax ruh u la kynnoh ba ki pyrshang ban kyntait bad kynnoh shawei. “ Kila kynnoh bad tei pop pynban sha ki ophisar hynrei ka jingshisha ka la paw pyrthei. Ki jingthmu bad jingkular kim ïadei satia. Ki la dei ban wad jingïarap na ki ophisar kiba shem phang bad kiba la shongthait. Kam long kaba suk ban long nongmihkhmat donkam ban ïamir jingmut, ban pynïadei bad ïalam da ka mynsiem kaba sngewrit” ong u ma Pala.
U la kynthoh ruh ïa ki social media jongka VPP kiba shu rahskong jubor beit ïa ki ym kiba ai jingmut bad ai jingmyntoi. “ Haba peit sha ki social media jongki nga ïohi ïa ka jingsngew hanga mei jongki kim don ka mynsiem sngewrit bad ka por kan sa poi ha kawei ka sngi ba kin sa ïoh hi ïa ka jubab. Mynta ka lah ban long ka por jongphi tangba kan sa poi ka por jong kiwei ruh namar ka ju jia kumta hi barobor” ong u ma Pala.
Ba kin shu kular la lut kam don jingmyntoi haba kim lah ban pyntreikam. Peit kaei kaba jia ïa ka Aam Aadmi Party ki shu kular kat ka bneng hynrei ha kaba kut haba la wan ha ka bor shiteng na ki nongïalam jongki ki don ha phathok. Kynmaw ka VPP ruh ka kob ban wanrah ïa ka jingsynshar kaa khuid hynrei peit mynta tang ki khyrdop lum pisa ki la nang jyllei. Kynmaw ka jingsynshar kan ym skhem haba ka ktien bad ka kam kim ïadei. Ki dei ban pyntreikam ïa kaei kaba ki kular ha ka Manifesto jongki hynrei jur sa tang ka kynnoh i kumba ïa pyni bor hapdeng ka sorkar bad ka KHADC katba kiba dang shah ktah pat ki dei ki paidbah” Pynkut u Ma Pala.
