Shillong, Naiwieng 24: Kawei ka pla rong ïong ha ka sngi Nyngkong ka la pynher syrngiew lut ïa ki paidbah ka sor Shillong namar ka jingsuba don bomb ha kane ka pla.
Ïa kane ka pla la lap ba buh hakhmat ka khyrdop jong ka State Bank of India (SBI) Main Branch, kaba don ha Police Bazaar.
Ha kaba ïadei bad kane na ka liang jong ki Pulit haba ïoh jingtip ïa ka jingdon ka pla ba ieh ha katei ka jaka, mar mar kila leit ban kerkut ïa ka jaka bad ki la khang syndon ïa ka leit ka wan ki kali kynthup ki briew ba kin ïaid na ka bynta ban shngaiñ jong kane ka jaka.
La ïohi ruh ba ka kynhun ki Pulit Bomb Squad kila wan poi mar mar ha kane ka jaka bad ha ryngkat ki tiar ïada, kila leit ban plied ïa kane ka pla ban tohkit ïa kaei kaba don hapoh.
Ha kane ka jingtohkit, ka kynhun ka la lap ba ha kane ka pla, ki don tang ki jaiñ bad kiwei ki tiar misteri kynthup u tyrnem. Ïa kane ka pla la rah noh da ka kynhun bad aiti sha ki Pulit ka Sadar Police Station, ban tohkit khnang ban lap ïa u trai.
