Shillong, Naiwieng 24: Ka North East Centre for Technology Application and Reach (NECTAR) ka la pynkutnoh ïa ka jingïalap kaba 3 sngi ban rakhe ïa ka Vigilance Awareness Week 2025, kaba kyntiew ïa ka jingïalong kawei, ka jingkhuid ka rukom treikam bad ka jingkheiñ kaba khuid ha kaba ïadei bad ki kam paidbah.
Kane ka jingïalap ka don ki prokram bapher bapher kiba kynthup ïa ka quiz, debate, bad painting competition, da ka jingïashim bynta ba shitrhem jong ki samla pule na kylleng ki jaka pule. “Ka jingrakhe ïa ka Vigilance Awareness Week ka dei ka kamram bad ka sienjam kaba kongsan ban kyntiew ïa ka kolshor jong ka rukom treikam kaba khuid ba suba,” ong u Dr Collin Z. Renthelai, Chief Vigilance Officer, NECTAR.
“Ngi ai khublei ïa ki nongïashim bynta, ki jaka pule bad ki dkhot ba ki la pynlong ïa kane ka prokram kaba jop bad kaba ïaid beit ïaid ryntih,” ong u Dr. Collin.
Ki nongjop ïa ka Inter School bad Inter College Competition ki la ïoh ïa ki khusnam bad ki syrnot, ha kaba ka Aayan Gurung of Seven Set Higher Secondary School ka la poi ha ka kyrdan kaba nyngkong ha ka school category, bad Jonistar Jyrwa ka Synod College ha ka kyrdan ba nyngkong ha ka college category.
Laweihaka Dkhar jong ka B.K. Bajoria Higher Secondary School ha ka kyrdan baar bad Deepali Chettri ka Army Public School ha ka kyrdan ba 3 ha ka school category katba Fabian Tyngkaihok Nongkynrih ka Shillong Commerce College bad Annibasuk Kharbani ka Synod College ha ka kyrdan ba ar bad ha ka kyrdan 3 ha ka college category.
Ïa ka special vigilance awareness session la pynlong da u Inspector na Central Bureau of Investigation (CBI), Shillong Branch, kaba la banjur halor ki kam kiba ïadei bad ka jinglong jingman, ka jingpeitngor bad ka jingpynlait ïa ka imlang sahlang na ki kam bamsap. “Ka NECTAR ka don ka jingangnud ban wanrah ïa ka khuid ka suba ha ki rukom treikam hapoh ka seng bad kumjuh ruh ha ka imlang sahlang,” ong u Dr Arun Kumar Sarma, Director General, NECTAR.
