Mairang, Naiwieng, 23: Ka Deputy Commissioner Eastern West Khasi Hills District Mairang, ka la pyntip paidbah ba ka sorkar India lyngba ka skhim Jal Jeevan Mission, ka la shna ïa ka project kaba heh na ka bynta ki jingtei kum ki tyllong um, ki jaka tan um, ki jaka pynkhuid, ki jaka buh um bad ki pipe pynpoi um bad sam um sha ki dong ki shnong bad ki tyngkong ïing. Ka long kaba donkam eh ba ïa kine ki tiar dei ban sumar bha khnang ban pynthikna ïa ka jingneh slem jong ki.
Ka Deputy Commissioner, ka la pyntip paidbah ban kiar na kaba pynjot, pynpra, lane tuh ïa kine ki tiar ba la mang na ka bynta kane ka skhim bad lada lap yn pynshitom katkum ka aiñ Bharatiya Nyaya Sanhita (BNS) 2023, ka Bharatiya Nagarik Suraksha Sanhita (BNSS) 2023, ka Aiñ ban ïada na ka jingpynjot ïa ki mar ki mata jong u paidbah, 1984, lane ka (Prevention of Damage to Public Property Act, 1984) ka aiñ ïada ïa ka mariang, 1986 lane ka (the Environmental Protection Act, 1986) bad kiwei kiwei ki aiñ bad ki kyndon lada I donkam.
La kyrpad ïa ki bor shnong, ki nongïalam shnong bad ïa ki riew paidbah, ba kin long kiba husiar bha ban ïada bad ha ka juh ka por ban pyntip sha ki bor ba dei peit, khnang ban ïada ïa kine ki jingdon jingem ba kongsan jong ki paidbah.
