Kylla jaka jngohkai pyrthei ka wah Kiang hadien ba pyndep ïa ka surok Athiabari-Umshiak

Nongstoiñ, Naiwieng, 23: Ka jingdon ki surok kiba pynpoi sha ki shnong ki thaw ka long ka jingkyrkhu kaba khraw ïa ki paitbah nongshong shnong bad ka kyntiew ruh ïa ka ïoh ka kot bad ka kamai kajih.
Haba phai sha ki shnong kiba don ha khappud bad ka Assam, kawei na ki surok kiba ka sorkar ka la sdang ban shna naduh ki snem ba mynshuwa, ka dei ka surok na Athiabari sha Umshiak kaba la bei pisa da ka sorkar pdeng lyngba ka skhim Pradhan Mantri Gramsadak Yojana.
Hynrei, na ka jingwan pynwit jong ki pulit Assam na ka por sha ka por kata naduh u 2018, kumta ym shym la lah ban pyntrei dep ha ka por kaba biang. Pynban hadien ba ka sorkar Meghalaya bad Assam ki la ïakren sngewthuh jingmut ha u snem ba la dep, la lah ban pyndep ban siang rong naduh Athiabari shaduh Umshiak, ha kaba ka jingjngai ka long 6.2 kilometer.
Ka jinglah ban pyndep ban siang rong ïa katei ka surok, ka la long ka jingkyrkhu kaba khraw ïa ki paitbah katei ka thaiñ. Kaba kham kongsan eh ka long ba ki nongshong shnong ki ban myntoi na katei ka surok Athiabari-Umshiak, ki kynthup ïa ka shnong Athiabari, Salpara, Olongop, Ranighat, Malapara, Mazpara, Umshiak bad kiwei kiwei ki shnong ba marjan.
Ym tang katta, hynrei naduh ba la shna pyndep, da ki spah ngut ki briew na kylleng ki bynta jong ka jylla Assam ki wan sha ka shnong Umshiak, ban wan kai sngewbha ha kawei na ki jaka kiba itynnad bha kaba la tip kum ka Umshiak Picnic spot kaba don harud jong ka wah Kiang.
U nongthoh khubor ha kine ki khyndiat sngi u la hiar sha katei ka jaka bad la lap ba da ki spah ngut ki briew kiba wan da ki kali rit bad don ruh kiba wan da ki bus ban leh kmen ha katei ka jaka.
Ha kaba ïadei bad katei ka jaka la lap ba baroh ki kali kiba rung ban leit kai ha katei ka jaka ki hap ban siew da ka bai rung bad haba ïakren bad ki nongpynïaid, ki la ong ba ïa ki kali ar sha ka ki ju shim laiphew tyngka kawei, ïa ki kali rit pat sanphew tyngka kawei bad ïa ki bus ki ju shim shi spah tyngka.
Haba kylli pat haduh katno ki lah ban ïoh lum ha ka shi sngi kitei ki nongpynïaid ki la ong ba ka shong ha ka jingbun jong ki nong wan kai namar lada dei ha ki bnai long skul kiba wan kai ki kham duna hynrei ynda la dei ki skul ki la ai shuti don teng teng ba ki lah ban ïoh lum kumba shiphew hajar shi sngi. Nalor kata, ki la ong ba ïa ka pisa kaba mih na ka jing lum na kiba wan ha katei ka jaka la pyndonkam na ka bynta ki kam shnong bad kiwei kiwei.
Kham shakhmat na katei ka jaka kumba saw kilomitar ei ei, ka don sa kawei pat ka shnong kaba la tip kum ka shnong Rangseng kaba don ha rud jong katei ka juh ka wah Kiang. Hynrei ka surok pat ka dang dei kaba khohruh khohram bad ka dang I donkam haduh katta katta, ba ka sorkar kan ai da ka surok kaba bha khnang ba ki paitbah nongshong shnong kin lait na ki jingeh ha ka leit ka wan.