Mynta yn sdang ka SSA Champions Cup; yn ïakhun nyngkong ka Mawkasiang pyrshah ïa ka Mylliem Lum
Shillong, Naiwieng 23: Ka jingap khmihlynti ïa ka lympung ïalehkai ba thymmai jong ka SSA Champions Cup 2025 kan kut noh ha ka sngi Nyngkong da ar tylli ki jingïakhun ha ka Group-A ha madan First Ground-SSA Stadium, Polo.
Ka jingmut jong ka Shillong Sports Association da kaba pynlong ïa kane ka lympung ka long ban pynïasoh lang ïa ki kynhun lahduh bad kiba wan kyrdan ba-ar jong ki san tylli ki Football Division ka SSA ha kawei ka lympung kaba kham kloi bad kaba itynnad bha. Kane ka lympung kan don 10 tylli ki klob kiba la phiah ha ki ar tylli ki Group ba mar san tylli, bad kin ïakhun markylliang shisien, ha kaba ki ar kynhun kiba wan hakhmat eh na kawei pa kawei ka Group kin rung sha ka semifinal.
Ka jingïalehkai kaba nyngkong kan long hapdeng ka Mawkasiang (lahduh ha ka Fourth Division) pyrshah ïa ka Mylliem Lum (lahduh ha ka Second Division) ha ka por 1 baje nohphai sngi. Nangta yn bud sa ka jingïalehkai hapdeng ka lahduh jong ka Shillong Premier League ka Langsning pyrshah ïa ka Umlyngka (kaba wan ba-ar ha ka Third Division) ha ka por 4:30 baje janmiet.
ïa ka jaka jong ki ar tylli ki kynhun ba khatduh la rai ha ka sngi Saitjaiñ da ka jingpynkut ïa ka First Division 2025. Ka Nongkseh bad ka Meghalaya Police ki la dep ban buh jaka ha ka Top 2 jong kane ka division hynrei hynnin ka sngi ka Nongkseh ka la rah ïa ka nam lahduh da ka jingjop kaba 1-0 kol pyrshah ïa ka MLP.
Kum ka lahduh ka Nongkseh kan shah kynthup ha ka Group B ha kane ka Champions Cup, katba ka MLP ha ka Group A.
Ka Group A ka kynthup ïa ka lahduh jong ka Shillong Premier League ka Langsning, Mylliem Lum (Lahduh ha ka Second Division), Umlyngka (Third Division runners-up), Mawkasiang (Lahduh ha ka Fourth Division) bad ka MLP (First Division runners-up). Katba ka Group B ka kynthup ïa ka kynhun ba wan ba-ar ha ka SPL ka Shillong Lajong, Laitkyrhong (Second Division runners-up), Mawkriah West (Lahduh ha ka Third Division), Mawlynrei (Fourth Division runners-up) bad ka Nongkseh (Lahduh ha ka First Division).