Khliehriat, Naiwieng 22 : Ha ka jingrakhe ïa ka taïew 22nd North East Metalliferous Mine Safety Week- 2025, kaba don ka jingthmu na ka bynta ka jingshngaiñ ki nongtrei kiba trei ha ki par mawshun jong ki company dewbilat, ka North East Metalliferous Mines, kaba hapoh ka jingpeit jong ka Directorate General of Mines Safety, Guwahati Region, mynta ka sngi ka 22 tarik naiwieng 2025 ka la pynlong biang ïa ka prokram ba kyrpang da ka jingiakop ai jingsumar kyrkieh ïa ki mynsaw lane ka First Aid Competition bad ïa kane ka prokram la pynlong ha Star Cement Ltd Lumshnong East Jaiñtia Hills District.
Kum ban shu phai dien, ha kane ka 22nd North East Metalliferous Mine Safety Week- 2025, myn ha ka 20 tarik ka North East Metalliferous Mines ka la pynlong ïa ka jingiakop Trade Test Competition ha kaba la iashimbynta da ki nongtrei jong ki karkhana dewbilat bapher bapher kiba don ha East Jaiñtia Hills District bad mynta ka sngi ruh ki nongtrei jong ki company dewbilat ki la ïa shimbynta biang sa ha katei ka jingiakop First Aid Competition.
Ha katei ka prokram, u Banothu Venkanna, uba dei u Deputy Director of Mines Safety u la long u kongsan bad u Abhimanyu Singh Ogra, uba dei u Deputy of Mines Safety, Guwahati Region kum u symbud kongsan.
Ki la don haduh phraphew ngut ki nongtrei kiba trei ha ki par mawshun jong ki karkhana dewbilat bapher bapher kiba don ha East Jaiñtia Hills District ba kynthup ruh ki Supervisor kiba na ki 17 tylli ki par (Opencast mines) lem bad khyndai tylli ki kynhun kiba na kiwei pat ki company ki la wan ban ïa shim bynta ha katei ka jingiakop First Aid Competition lane ka jingiakop ha kaba ai jingsumar kyrkieh, ïa kane ka prokram First Aid competition la pyniaid da ki doctor kiba la tbit bha kaba hapoh ka jingialam u Dr. Naushad Ali uba na ka Lafarge Umiam Mining Private Limited bad u Dr. Sarungbam Sharatchandra Singh uba dei u Doctor na ka company Star Cement Limited Lumshnong.
Ha katei ka jingiakop ka la don ka written test, ka jingpyni nuksa kumno ban ai jingsumar kyrkieh lane kata ka Practical Demonstration, ka First-Aid Kit Checking bad ka riam ka beit lane ka Dress Code jong kito kiba ai jingsumar kyrkieh lane ka First Aider.
Ki la don haduh 45 ngut kiba la jop ha katei ka jingiakop ai jingsumar kyrkieh lane ka First Aid Competition ha kaba ki la ioh khur ïa ki prize ha kajuh ka por u kongsan bad u symbud kongsan ki la ai burom ruh ïa ki doctor kiba la pyniaid ïa kane ka prokram First Aid Competition da ki memento.
