Shillong, Naiwieng, 21: Ka Sainik Welfare Board ha ka sngi Thohdieng ka la pynlong ïa ka prokram ha Raj Bhavan ban pynkup burom ïa ki shipai ïakhun thma, ki Veer Naris, bad ki ophisar jong ka Sainik Welfare Board, ha kaba la leh burom ïa ka jingnoh synniang kaba khraw, ka jingaiti, bad ka jinglen lade jong ki na ka bynta ka ri.
Ha kane ka sngi, la sakhi ruh ïa ka jingïashim bynta lang jong ki shipai ba la shongthait, ki bahaing hasem jong ki shipai ba la khladnoh, bad ki bahaïing hasem jong ki shipai.
U Lat ka Jylla u CH Vijayashankar uba la long u kongsan ha kane ka sngi u la pynpaw ïa ka jingsngewnguh bad ka jingsngew burom ïa ka jinglen lade jong ki shipai ban ïada ïa la ka ri.
Ha ka jingkren jong u, u la ong, “ka jingsuk, ka jingkiew, bad ka jingsynshar jong ka jaitbynriew ka ieng skhem ha ka nongrim jong ki jingaiti bad ka jinglen lade da ki shipai. Ki riewshlur ki dei ki sakhi ba im jong ka bor shipai jong ka India bad ka mynsiem ieit ri, ha kaba ka jingshakri jong ki ka dang ïai bteng ban ai mynsiem ïa ki pateng kiba dang thymmai.”
U la ai ruh ka jingithuh ïa ki Veer Naris kiba dei ki kurim jong ki shipai ba la khladnoh ha ka jingïada ïa ka ri na ki nongshun.
U Lat u la ïaroh ruh ïa ka jingtrei shitom jong ki ophisar ka Sainik Welfare Board na ka bynta ka jingtrei shitom jong ki ban peit ïa ka bha ka miat jong ki shipai.
“Ka jingshakri ba aiti lut jong phi ka pynthikna ba ïa ki jingdonkam jong ka imlang sahlang jong ka tnat ïada ri la pynbeit da ka burom bad ka jingsngewrit, kaba pynpaw ïa ka jingaiti jong ka Jylla na ka bynta ka jingbha jingmiat jong kito kiba la shakri ïa ka jaitbynriew,” la pynpaw u Lat.
Ha kane ka prokram ki shipai ba la shongthait ki la ïasam ïa ki khubor bad la pynku buromk ruh ïa ki shipai ba la shongthait bad ïa ki kurim jong ki shipai ba la khladnoh.
Ka la don ruh ka jingïakren ban pynkhlaiñ ïa ka jingai jingkyrshan ïa ki longïing jong ki shipai ba la shongthait bad ïa ki longïing longsem jong ki.
Ki shipai ba la shongthait bad ki Veer Naris ki la pynpaw ïa ka jingsngewnguh halor ka jingai jingithuh da kaba pdiang ïa ka jingbteng jong ka Jylla na ka bynta ka jingbha jingmiat jong ki.
