Shillong, Naiwieng 20: Arngut ki nongïalehkai judo ka jylla Meghalaya ki la khur takma ha ka lympung ïalehkai Sub-Junior National Judo Championship 2025-26 ha Hyderabad, la pyntip ka Meghalaya Judo Association hynnin ka sngi.
Kine ki nongjop takma ki long u Adric L Nonglait na East Khasi Hills uba la khur ïa ka takma rupa ha ka kyrdan ïalehkai kaba -66kg bad ka Larika Kharkhylliang na Eastern West Khasi Hills kaba la khur ïa ka takma rnong ha ka kyrdan ïalehkai -48kg.
Kane ka lympung ba la pynlong da ka Judo Federation of India, ka la sdang naduh ka 16 tarik u Naiwieng. Namar ki eksamin skul, tang 8 ngut ki nongïalehkai Judo na ka jylla ki la ïoh ban ïashim bynta mynta u snem.
Ïa ka kynhun ïalehkai ka Meghalaya la ïalam da u coach/manager u Jonathan Lalrinsanga.
Ka jingjied ïa ki nongïalehkai Judo ka long katkum ka jingtbit jong ki ha ka lympung ïalehkai Judo kaba la tip da ka Meghalaya State Championship ha u bnai ba la dep.
Halor kane ka jingjop na ka liang jong ka MJA ka la ai khublei ïa baroh arngut ki nongïalehkai bad kitbok kitrwiang ba kin dang ïai bteng ban jop ha ki lympung ki ban sa wan. Ka la ai khublei ruh ïa ki coach, ki nonghikai bad kiba haïing hasem na ka bynta ka jingkyrshan jong ki.
