Shillong, Naiwieng 19 : Ka kynhun ki Executive Member jong ka KHADC kaba kynthup ïa u Executive Member ka tnad Development, u Bah Powell Sohkhlet, u EM ka Finance u Bah Seiborlang Warbah, u Nominated MDC, Bah Matthew Makdoh ryngkat ki ophisar ka KHADC, ha ka 19 tarik u Naiwieng 2025, ki la ïakynduh ïa ka Myntri ka tnad pla tyngka jong ka sorkar pdeng ha New Delhi, ka Nirmala Sitharaman ban ïakren halor ki jingdonkam kiba ïadei bad ka jingpyntreikam ïa ki skhim ne project ba la mang pisa da ka Finance Ministry lyngba ka Fifteenth Finance Commission ba la pynïaid da ka Ministry of Panchayati Raj.
Nalor ka jingpyntreikam ïa ka Fifteen Finance Commission, u nongaiktien jong ka Executive Committee, u Bah Powell Sohkhlet hadien ba la ïakynduh ïa ka Myntri, u la ïathuh ba ka jingïakynduh ka long kaba seisoh ha kaba ka la bthah ïa ki ophisar ban wad ki lad ki lynti ban pyllait noh ïa ka pisa kaba sah jong ka Fifteenth Finance Commission.
U Bah Powell u la ïathuh ba ka Council ka la kyntu ruh ïa ka Myntri ban ai jingïarap da ka song ba kyrpang na ka bynta ka council na ka bynta ki jingtreikam bapher bapher ha ka roi ka por ki paidbah.
Hynnin ka sngi ka Kynhun ka la ïakynduh ïa u Joint Secretary bad ki ophisar jong ka Ministry of Panchayati Raj kaba dei ka tnad ba pyntreikam ïa ki Project jong ka Fifteenth Finance Commission.
