Nongpoh, Naiwieng 19 : Da ka jingphuh jingphieng ka Central Agricultural University Imphal mynta ka sngi ka la pynkut noh ïa ka CAU Regional Agri Fair 2025–26 kaba lai sngi ba la pynlong ha College of Agriculture, Kyrdemkulai ha RI Bhoi District bad ïa kane ka lympung ki nongrep la wan ban pynhap pyrda da u Dinesh Dattatreya Kulkami uba dei u Organizing Secretary ka Bharatirya Kisan Sangh kum u kongsan bad u MLA ka Umsning u Dr. Celestine Lyngdoh bad ka Prof. Nalini Prava Triphathy, Director ka IIM, Shillong kum kita ki symbut kongsan.
Kiwei kiwei de ki heh ki hain ba la ïa sakhi lang ha kane ka sngi ki kynthup naduh u Dr. Anupam Mishra, Vice-Chancellor ka Central Agricultural University (CAU), Imphal; u Prof. Ranjit Sharma, Director ka Directorate of Extension Education, CAU Imphal; u Prof. Ram Singh, Dean ka College of Agriculture, Kyrdemkulai, ki saiantis, ki riew shemphang ha ka rep ka riang,ki samla pule lem bad kiwei kiwei kiba don bynta ha kaba kyntiew ïa ka kam rep ka kam riang.
U Vice Chancellor u Dr. Anupam Mishra ha kane ka sngi u la kren thikna halor ki dak ki shin ba ki jylla shatei lam mihngi ka ri india ki don ïa ka bynta kaba khraw ha kaba kyntiew ïa ki kam rep kam riang hapoh ka ri India bad u la ong ruh ba ka kane ka Agri Fair ka dei kawei na ka rynsan ban lum lang ïa ki nongrep, ki samla pule, ki nongwad bniah, ki nongsengkam seng jam bad kiwei kwei kiba long ka jingai mynsiem ban kyntiew ïa ka rep ka riang.
Na ka liang u kongsan .u Dinesh Dattatreya Kulkarni bad kynthup ruh ïa ki symbut kongsan u Dr. Celestine Lyngdoh bad ka Prof. Nalini Prava Tripathy haba kren ha kane ka sngi, ki la pynpaw ïa ka jingkmen ban ïa don ryngkat ha kum kane ka rynsan ban ïa thir ne ïa thaw ïa ki buit treikam ban kyntiew ïa ki kam rep kam riang ym tang haka jylla Meghalaya bad ha ki jylla shatei lam mihngi ka ri india bad ha ka ri India hi baroh kawei.
Kine ki kongsan jong kane ka sngi ki la ïaroh ruh ïa ka CAU Imphal kaba la pynlong ïa kum kane ka lympung ne ka rynsan ban ïa tai ne ïa thir halor ka kam rep ka kam riang, namar lah ban ong ba ha ki jylla shatei lam mihngi ka ri India kiba bun hi ki dei kiba im lyngba ka kam rep ka kam riang bad donkam ban don kataka jingïatrei lang na baroh ki liang ban kyntiew ïa ki nongrep bad haba kiew ki nongrep, kan kiew ruh ka ioh ka kot ki nongrep bad jong ka ri hi baroh kawei.
