Ranji Trophy 2025-26: Duh rung ka Meghalaya ha ka Plate Group final hadien ka jingjop jong ka Bihar pyrshah ïa ka Mizoram

Shillong, Nov 19: Ka jingïalehkai plate group hapdeng ka Meghalaya bad ka Manipur ha ka Ranji Trophy 2025-26 ka la kut noh ha ka jingïakhaid hynne ka sngi Balang, hynrei kane ka jingïalehkai kam shym la kut khlem da sakhi ïa ka spah ron kaba ar jong u Rahul Dalal (guest player).
Haba sdang biang ïa ka pali tied kaba ar (2nd inning) na ka 49/1, ka Meghalaya ka la pynkut da kaba kamai 239 ron bad khyllem 4 wiket, kaba buh ïa ka thong kaba ym lah ban long kaba long 328 ban jop, kaba ka Manipur kam shym la don jingthmu ban beh; ki la pynkut ïa ka jingïalehkai ha ka 72/1.
Haba phaidien, ka Meghalaya ka la kamai 430 ron (all out) ha ka pali kaba nyngkong (1st inning) ha kaba ka Manipur ka la jubab da kaba kamai 342. Kane ka la pynlong ïa ka Meghalaya ban lamkhmat ïa ka pali kaba nyngkong da 88 ron bad 3 poiñ.
Ka Meghalaya ka la pynkut ïa ka Ranji Trophy khlem shah rem mynta u snem hynrei ka jinglong jingman kaba sniew jong ka suiñbneng bad ka jingsngem ki bynta jong ka madan ka la pynduh noh ïa ka lad ban jop kawei ne ar tylli ki jingïalehkai. Pynban ki la pynkut da kaba khur kawei ka jingjop (pyrshah ïa ka Arunachal Pradesh), ïakhaid lai sien (pyrshah ïa ka Manipur, Bihar bad Sikkim) bad kawei ka no result (pyrshah ïa ka Mizoram).
Wat la katta ruh, ka kynhun ka la jan bha ban rung sha ka plate group final bad sha ka kyrdan Elite Group ha ka samoi ban wan. Hynrei, ka jingïalehkai ba kyrpang jong ka Bihar ha Patna pyrshah ïa ka Mizoram hynne ka sngi Balang ka la pynlong ïa ka ban wan ha ka kyrdan ba ar ha ka miej kamai poiñ. Da kaba donkam 248 ron ban jop katba dang sah sa tang 30 ober ha ka sngi, ka Bihar ka la tied 251/3 ha ki 27.4 ober ban khur 6 poiñ. Ka Meghalaya ka la pynrem ïa ka rai jong ka Mizoram ban pynbna pynkut ïa ka pali kaba ar (2nd inning) jong ka ha kaba u President ka Meghalaya Cricket Association u Nababrata Bhattacharjee u la khot ïa kane ka rai “ka jingkyndit tam ban ong” bad “ka jingpyrshah ïa baroh ki jingmut jingpyrkhat jong ka kriket”.
Ha kaba kut, ka Manipur ka la wan hakhlieh duh ha ka Group da kaba kamai 18 poiñ, ka Bihar ka la kamai 16 poiñ bad ka Meghalaya ka la wan ba lai da kaba kamai 15 poiñ.
Hynne ka sngi, u Rahul uba la kamai 151 ron ha ka inning kaba nyngkong, u la lah ban kamai sa kawei pat ka spah ron, da kaba tied 103 ron khlem da shah pynhap (not out) na ki 131 tylli ki bol (11x4s, 1×6). U Kishan Lyngdoh ruh u la don jingkyrmen ban kynjoh ïa ka spah ron hynrei u la shah weng noh na ka bynta 76 ron (123 bol, 8x4s, 1×6).
Ki la don shibun ki khyllipmat kiba sah jingkynmaw na ka bynta ki rangïalehkai ka Meghalaya mynta u snem – kiba kynthup ïa ar tylli ki spah ron da u Arpit Bhatewara pyrshah ïa ka Arunachal bad ka Sikkim; lai tylli ki spah ron na ka bynta u Rahul bad mar ar tylli na ka bynta u Ajay Duhan bad u Kishan – hynrei kaba la sahkut ha ka histori ka dei ka 50 ron kaba stet tam jong u Akash Chaudhary na ki 11 tylli ki bol pyrshah ïa ka Arunachal, kaba dei ka shiteng spah ron kaba stet tam ha ka kyrdan ïalehkai kriket ba la paw, ka sien kaba nyngkong eh ba u nongtied u la thlieh haduh 8 tylli ki six marïabud bad tang ka sien kaba lai ba u nongtied un khyrwit 6 tylli ki six ha ka shi ober ha ka jingïalehkai kriket first-class.
Utei u nongkawang bol ba stet u la don lang ruh ha ka kyrdan ba saw (joint) napdeng ki nongkawang bol da kaba khur 14 wiket, kynthup ïa ka jingïoh khur san wiket (ka sien kaba lai jong u ha ka jingïalehkai kriket first-class) pyrshah ïa ka Sikkim, katba u Aryan Borah u don ha ka Top 10 da kaba khur 11 wiket.