Leh bym suitñiew u Myntri Rangbah ïa ki MLA ka liang pyrshah na ki prokram sorkar: Rupa Marak

Shillong, Naiwieng 18: U MLA ka liang pyrshah jong ka seng TMC na Dadenggre u Rupa M Marak u la kynnoh ïa u Myntri Rangbah ba u la leh bym suitñiew ïa ki MLA ka liang pyrshah na ki prokram ka sorkar bad ba la kynnoh ruh halor ki jingduna jong ki kam pynroi ha ki constituency.
Haba phai sha ki jingkynthoh jong u Myntri Rangbah ha kaba u la kynnoh ba ki constituency ba don da ki MLA ka liang pyrshah ki duna bha ki kam pynroi namar ki jingmihkhmat jong ki, ki kham phai sha ki kam kiba bakla ban ïa ki kam kiba shisha, u Marak u la ong ba ka jingkam u Myntri Rangbah ka long kaba marpyrshah, kaba ïalam bakla bad kaba ym lah ban pdiang, naba ka sorkar manla ka por ka khanglad ïa ki MLA ka liang pyrshah ba kin ïashim bynta ha ki prokram sorkar ha la ki jong ki constituency.
U Marak u la ong ba kane kam dei ka prokram jong ka party haba la khmih lynti ïa ki nongïalam ka party, hynrei ka prokram sorkar kaba u MLA ka thaiñ u dei ban don bynta lang.
U la kynthoh ïa ka sorkar da kaba ong ba kam don jingmon ban pyndonlang ïa ki MLA ka liang pyrshah bad kynnoh ba wat ki bor pynïaid ki la kyntait ban khot ïa u, kum ka jingpyntip bad ki jingkhot sngewbha khamtam ha la ka jong ka constituency Dadenggre.
U MLA u la pynkynmaw ruh ïa kiba bun ki jingjia ba u la ju shah leh bym ithuh na ki prokram sorkar.
U la ong ba ka jingïasoi MoU hapdeng ka AAI bad ka sorkar jylla ka prokram kaba dei ban don lang u MLA, hynrei ha kane ruh u la shah kyntait.
“Nga leh ïa kane mynta na ka daw ka jingsngewkhia bad nga da sngewkhia shisha ïa kane ka jingshah leh bym suitñiew. Ha ka sngi nyngkong haba don ka prokram plie ha Jengjal, ïa ka Jengjal police station building bathymmai ïa nga ki khlem pyntip. Hynrei kum u MLA nga la dei ban shah khot ne ban pyntip, hynrei ym don jingpyntip da ki bor pynïaid ne ka sorkar,” u la bynniaw.
U la ong, “Kane kam dei ka sien kaba nyngkong naba ha ka por ba buh mawnongrim ïa ka jingkieng Ringgi, nga khlem shah khot. U MLA barim ka Dadenggre u James Sangma u la don ha kane ka prokram kum u kongsan, hynrei u MLA um donlang.”
U la buh ka jingkylli hato kadei namarba u kren hapoh ka Ïingdorbar thaw aiñ ba ka sorkar ka leh kumne ïa u. “Balei la leh kumne ïa nga, ngam tip balei, hato dei namarba nga kren ha Assembly? Nga kren ïa ki kam kiba donkam jong ka constituency. Kadei ka kamram jong nga ban leh ïa kane ban kren na ka bynta ki briew jong nga.”
Haba kular ba un ïaibteng ban ïakhun, u Marak u la pynbna ba um lah satia ban sngap shuh. “Nga dang ïaikren shuh shuh naba kane ka dei ka kamram jong nga ban pynpaw ki jingsngewkhia hapoh ka ïing ïa ki jingdonkam ki paidbah,” u la ong.
U Marak u la ong ba ka jingkam jong u Myntri Rangbah hakhmat ki paidbah halor ki jingduna ki kam pynroi ba don ki MLA ka liang pyrshah ka long ka jingpyrshang ban ïalam bakla. “Nga tip ïa la ka jong ka kamram bad ki hok. Nga tip ïa ki hok bad yn ym don mano mano ba lah ban knieh noh ïa kane ka hok. Ngan ym lah ruh ban sngapjar, bad ngan ym lah ban pyndem naba ïa ka saiñ pyrthei la ïaleh ha kipor elekshon ym ha ki prokram sorkar,” pynkut u Marak.