Shillong, Naiwieng, 18: : Ka Hynniewtrep Youths’ Council (HYC) ka la pynpaw ïa ka jingpyrshah kaba jur ïa ka jingpynwit bad ka jingsawa kaba palat pud ki jingtem kiba mih ha ka tamasa Cherry Blossoms Festival-2025 kaba dang shu kut shen, kaba la pynlong ha JN Stadium Polo, kaba don ruh hajan ki shnong.
Ha u kyrwoh ba la phah sha ki lad pathai khubor ha ka sngi Baar, ka HYC ka la pynpaw ba katto katne ngut ki nongshong shnong ki la pynpaw ïa ka jingeh namar ka jingsawa kaba jam, ki kam kiba la jia mynmiet, ka jingkhapngiah kali, bad ka jingbymbiang ka rukom ïaid ki paidbah kaba ïadei bad kum kine kam kiba heh.
“Kum kine ki jingpynthut ki la ktah ïa ki rukom im ba manla ka sngi, ki por shongthait, bad ka jinglong jingman baroh kawei jong ki longïing, ki samla pule, ki nongshong shnong kiba la tymmen, bad ki nongtrei kiba sah hajan ka JN Stadium ha Polo,” ka la ong.
Ka HYC ka la ban jur ba watla ki tamasa kum ka Cherry Blossoms ki lah ban noh synñiang sha ka ïoh ka kot jong ka Jylla, hynrei kim dei ban wan ha ka dur ba pynthud ïa ka imlang sahlang.
“Ka jingpynïahap ïa ka jingpynlong ïa kum kine ki jingïalang bad ka hok jong ki nongshong shnong ban ïoh ïa ka jingsuk bad jingshngaiñ ka dei ban long kaba kongsan tam. Ka jingpynbyrngia jong uwei kam lah ban pynduh ïa ka hok ba kongsan jong kiwei pat ki nongshong shnong ban im ha ka jaka kaba shngaiñ bad kaba suk,” ka la bynrap.
Ka HYC ka pyrshah jur ïa kino kino ki lympung kiba kum kine kiba lah ban pynlong ha ki jaka sah briew khamtam hapoh ka sor Shillong, ha ki por ban wan.
“Katba lah kum kine ki lympung dei ban pynlong ha ki jaka bym don briew bad ha ki jaka ba shabar jong ka Nongbah Shillong,” la ong ka HYC.
Ka HYC ka la kyntu ïa ka Sorkar ba kan shimkhia ïa ki jingeh bad ban pynthikna ba ki tamasa kiba long hadien habud kim dei ban pynthut ïa ki nongshong shnong.