Nalor ki 37 ngut ki nurse kiba don ha Japan, kin dang don shuh ki ban sa nang leit : Conrad

Shillong, Naiwieng 17: U Myntri Rangbah ka Jylla Conrad K Sangma ha ka sngi Nyngkong ula pyntip ba ka jylla Meghalaya ka la pynkhlaiñ ïa ka jingïatreilang bad ka ri Japan ha kiba bun ki kam bad ki liang naba ha kane ka kynti ba mynta nalor ki 37 ngut ki nurse kiba don ha ri Japan, kin sa nang don shuh shuh kiwei pat ki ban sa leit.
Ia kane u Conrad ula pyntip haba kren ha ka jingïalang plie ïa ka Japanese Language Training Programme ba la pynlong da ka Meghalaya State Skill Development Society, nangta ka tnat Labour, Employment & Skill Development ka Jylla ha ka sngi Nyngkong ha Mount View Building, Barik, Shillong.
Haba kren u la ong, “Ka rukom pyrkhat jong ngi ka long kaba shai bha bad kaba da pynleit jingmut bha, ngim kwah ban don ka jingïateh bad bun ki ri ka pyrthei namar lada phi pyrshang ban ïatehlok bad baroh, phin nym don satia ïa ka jingïadei badno badno ruh.”
U Myntri Rangbah u la bynrap da kaba ong ba ka ri Japan bad ki Jylla ka thaiñ shatei lammihngi ki don ka jingïasynriem ha kiba bun ki liang la ka dei ka bam ka dih, ka kolshor bad ka ri Japan ka dei kaba la ïatreilang bad ka ri India la bun bun snem.
Haba ïathuh ïa ka jingïaid lynti ka jingïatreilang bad ka Japan, u Myntri Rangbah ula ong ba arsnem mynshuwa tang arngut ki nurse la phah sha Japan bad haduh mynta, kila don haduh 37 ngut ki nurse ha Japan bad bun kin sa nang leit ha kine ki bnai ban wan.
“Ki nurse kiba trei ha Japan mynta kila don ha ka N4 Grading bad ngi kyrmen ba ki Nurse jong ngi kin poi ha ka N3 Grade ba kin ïoh ka tulop ba kham heh. Ki nurse jong ngi kila lah ban phah pisa sha la ïing haduh T. 1 lak bad ka jingkylliang pisa ha ka Jylla jong ngi lyngba kine ki 37 ngut ki nurse ka la kot kumba T.5 klur shisnem,” bynrap u Myntri Rangbah.
U Myntri Rangbah ula ong ba ka Sorkar ka kwah ban ai ïa ki pali sha ki samla ka jylla ba kin leit sha ri Japan ym tang ban kamai jakpoh hynrei ban ïoh ruh ïa ki jingshemphang bad bynrap, “Dei hangne ba ka jingïatehlok hapdeng ka ASEAN Group bad ka Sorkar Meghalaya ka la mih bad ngi kum ka Sorkar ki la pynbeit lut ïa kiei kiei baroh”.
U Myntri Rangbah ula pyntip ruh ba 37 ngut ki nurse kiba don ha Japan kila hap ban leit hikai pyntbit ïa ka ktien Japan ha Bangalore kaba long haduh hynriew bnai. “Phi long kiba donbok namar mynta phin ïoh ïa ki jinghikai pyntbit ha Shilllong,” ula pynpaw.
Haba pdiang ïa ki arngut ki nonghikai na Japan, u Myntri Rangbah ula ong ba watla kin don ki jingeh, ka Sorkar bad ki nongshong shnong ka Jylla kin ïaleh katba lah ban pynthikna ïa ka jingwan sah ba suk ka saiñ jong ki ha Jylla.
Haduh 86 ngut ki samla pule kila pynrung kyrteng ha kane ka Japanese Language Training Programme ba hynriew bnai.
Kiba la ïadonlang ha kane ka jingïalang plie ki kynthup ïa u Myntri ka Tnad Labour Bah Methodius Dkhar bad ka Chairman bad CEO ka ASEAN Group Co Ltd Nishukwa Toshiaki San nalor ki nonghikai ka Japan bad ki ophisar ka MSSDS.