Shillong, Naiwieng 17 : Ka Meghalaya ka la kiew stet ha ka jinglah ban pynbiang umbam umdih ha ki longiing longsem ha nongkyndong hynrei hapdeng kine ka don pat ka jingma ba ka jingkylla ka suinbneng ka lah ban ktah ïa ka jingpynbiang ïa umbam umdih.
Na ka liang u Myntri ka tnad Public Health Engineering (PHE) ka sorkar jylla u Marcuise N. Marak u la pyntip ba 82 persen mynta na ki longiing ha nongkyndong ki la ïoh ïa ka umbam umdih ha ki iing ki sem jong ki lyngba ka skim JJM da kaba ong ruh ba kane ka sienjam kadei kaban thaw ïa ka histori na ka bynta kito ki shnong kiba ym poi pyrkhat ban ïoh ia kitei ki jingmyntoi.
Tangba ha kajuh ka por pat u la pynpaw ïa ka jingkhuslai namar ka jingnang hiar ka jingdon ki tyllong um ha ka jylla kaba la hiar mynta sha ka 30 persen na kaei kaba don ha u snem 2019 na ka daw ka jingkylla ka suinbneng. “Ka jinglong jngman kadei kaba shisha bad kaba i shyrkhei ka long ba kane ka la nang kiew,” u la ong da kaba maham ba ki wahduid bad ki tyllong um kiba don kyrhai mynshwa ha ka jylla mynta bun ki la ringsdot lut.
Tangba u ong pat ba mynta kaba don jingkyrmen ka long ba la nang don ki tyllong um kiba peit ba khmih da ki shnong ki thaw.
U ong ruh ba ki don beit ki jingeh ha ka jingpyntreikam ïa ka skim la ka long naduh ka jingkajia, ka jingïoh jingbit na ka tnad khlaw, bad ka jingjah lut ki tyllong um. “Ki pipe um ki sahkut ha kiot ki jaka ba ki trai ki pyneh, kine ki jingjia ki ktah lut ka por bad ka jingshaniah,” bynrap biang u Myntri.
