Khliehriat, Naiwieng 17: Ka Khasi Students’ Union South West Border Circle (KSU-SWBC) kan sa pynlong ïa ka jing ai khusnam bad jingpynkup burom da “1st Mait Shaphrang Academic Awards” ïa ki Samla kiba na ka thaiñ khappud kito kiba pass bha ha ki exam bapher bapher bad ruh ïa kito ki samla ba wan rah burom ha ki kam jing ialehkai sports bapher bapher ki ba la mih khmat ïa ka District, State ne ïa ka ri.
Lyngba u kyrwoh la pynshai ruh ba ki samla ki ban ioh pdiang ïa katei ka khusnam bad jingpynkup burom ki dei tang kito ki samla kiba dei ki nong shong shnong kiba ha ka thaiñ khappud kiba hap hapoh ka jingpeit jong ka KSU South West Border Circle ba kynthup naduh Borsara, Lejri, Lahaleiñ-Lailong, Huroi, Hingaria, Kwator, Pdeinwah Khynriam, Natbor, Demlakang, bad Borghat bad kin dei tang ïa kito ki samla kiba ioh 65% percentage sha jrong ha ka Exam SSLC, 60% Percentage shajrong ha ka Exam HSSLC, 55% percentage ha ka exam Graduate bad Post Graduate bad 50% percentage ïa ki samla ba pass ha ki jingpule bapher bapher (Professional Course) kum ki Engeneering, Doctor, Nursing, Lawyer bad kiwei kiwei de.
Ka seng ka kyrpad ïa ki samla pule kiba kwah ban apply ïa katei ka khusnam ba kin sngewbha ban phah ïa ki marksheet jong ki lane ban shu phah ruh lyngba ka WhatsApp number jong kine ki Nongïalam, u samla samla Pynshngaiñ Lamin Publicity Secretary KSU South West Border Circle – 7085853934, samla Anthony Pohti Assistant Education Secretary KSU South West Border Circle – 7085718466 bad ha u samla Andrias Talang Education Secretary KSU South West Border Circle – 8414076812 / 9366465857 (Whatsapp) bad ka tarik ba khadduh ban pdiang ïa ki application kan dei ha ka 15/12/2025 ïa ka tarik bad jaka ban pynlong ia kane ka prokram yn sa pyntip ha dien.
