Shillong, Naiwieng 15 : U Myntri ka tnad Information and Public Relations jong ka sorkar jylla, Bah Lahkmen Rymbui u la ong ba ki lad pathai khubor ki don ïa ka bynta kaba kongsan bha ban pyntip ïa ki khubor kiba shisha bad kiba don jingmyntoi sha ki paidbah nongshong shnong ha kane ka juk digital.
Ïa kane u Myntri u la pynpaw haba kren kum u Kongsan ha ka National Press Day halor ka phang, “Role of Print Media in the Digital Age,” kaba long ha kane ka sngi Saitjain ha nongbah Shillong.
Haba kren ha kane ka sngi, u Myntri u la ong ruh ba ki paidbah ka jylla mynta ki shem shitom bha ïano ban ngeit haba ki peit ïa ki lad pathai khubor namar ka jingnang jur ki lad jingpyntip khamtam da ka jingnang bun ki tyllong ban pathai jingtip la ka long naduh ki kot khubor, ki electronic bad ruh ha ka digital.
Kumta, u la banjur ba dei sa tang ka jingshaniah kaba lah ban pynskhem ai ka nongrim jong ka kam thohkhubor kata da kaba pynshitom ïalade ban pyntikna shwa ïa ki khubor ba kaei kaba pyllait sha ki paidbah ka dei ban long kaba shisha, kaba tikan bad kaban pynmyntoi ïa ki paidbah nongpule. Shuh shuh u la ong ruh ba ka long ruh kaba donkam ïa ki nongthoh khubor ba kin buh hakhmat khamtam ïa ka burom jong kito kiba tlot bor bad kibym lah ban ïada dalade ïalade.
Da kaba pynkynmaw ïa ka Meghalaya Media Meet kaba dang shu lah shen, u Myntri u la pynkynmaw ïa ki kyntien jong u Myntri Rangbah ka jylla Conrad K Sangma ïa ka jingïadei jong ki saw païa hapdeng ka sorkar jylla bad ki lad pathai khbuor, kata ha ka rukom pathai khubor kaba bud ïa ki kyndon, ka jingshaniah jong ki paidbah, ka jingpyndonkam da ka jingkitkhlieh ïa ka juk stad mynta bad ruh ka jingtrei da ka jingai jingkhein.
Shuh shuh u ong ruh ba lada phai sha ka Meghalaya, ka jingburom ia ka kolshor, ka ktien ka thylliej, ka jingsngew jong ka imlang sahlang ka dei kaba kongsan bha.
Haba kren pat halor ki kor ki bor katkum ka juk stad mynta, u Myntri u la banjur ïa ka jingpyndonkam ïa ki kor ditigal, nangta ka jingpynshisha da ka jingïarap jong ka AI, bad ki khubor kiba dei ha ka ktien ba sngewthuh paidbah khnang ban pyntikna ba ka jingshisha kadei ban jop ïa ki jingtip kiba thmu ban ïalam bakla.
Ha kajuh ka por u Myntri u la banjur ruh ba ki lad pathai khubor ki dei ban da wad bniah bha bin pa bin ïa ki jingshisha khnang ba ka khubor kaba ki pyllait kan ai ka jingmyntoi, kan ïarap ruh ïa ka sorkar lada don kino kino ki kam kiba kum ki tnad sorkar ki hap ban pynbeit bad bun kiwei kiwei kiban long kum ka jingkieng hapdeng ki paidbah bad ka sorkar khamtam ban kyntiew ïa ka imlang sahlang ka roi ka pa jong ka jylla.
Shwa kane la ïoh ruh ïa ka jingkren na u Commissioner and Secretary jong ka tnad IPR, u Vijay Kumar Mantri u ba la ïaroh ïa ka jinglah ban pynlong ïa ka National Press Day kaba shongkun da kaba lah ban wallam lang khrui ïa baroh ki nongthoh khubor na kylleng ki bynta jong ka jylla kynthup lang mynta ka kynti naduh rilum Garo ruh.
Hadien kane, u Myntri u la sam ruh ïa ki khusnam sha ki nongjop ha ki jingïalehkai basketball, carrom-board bad kiwei kiwei ki jingialehkai.
