Nongstoiñ, Naiwieng, 14: Ka Ophis jong ka District Horticulture Officer West Khasi Hills District Nongstoiñ, ka la pynlong ïa ka prokram kaba ar sngi lynter jong ka KISAN MELA kaba hap hapoh ka Mission for Integrated Development of Horticulture (MIDH) bad ka flower show ha ryngkat ka jingïatreilang bad ka Nongstoiñ Agri Horti Society. La sdang ïa kane ka prokram ha ka sngi Palei bad la ïoh ban pynkut ha ka sngi Thohdieng.
Ïa kane ka programme la pynlong ha ophis jong ka District Horticulture Officer Nongstoiñ, ha kaba u Bah S. Rani Director Horticulture Shillong u la long u kongsan, ha ryngkat ka jingïadonlang jong I Kong S.E Marbaniang District Horticulture Officer Nongstoiñ, Bah T.Diengngan ADH, Bah H.Ch Marak ADH (MKT) Bah M.Makdoh ADA, President bad Secretary jong ka Nongstoiñ Agri-Horti Society, ki nongrep napoh ki block kiba pher jong ka West Khasi Hills District, kumjuh ruh ki nongrep syntiew kiba la don haduh 77 ngut kiba la wan ban pyni nam ïa ki syntiew ki skud jong ki.
Haba kren kum u kongsan ha kane ka sngi, u Bah S. Rani kum u kongsan, u la pynkynkymaw, ba ka la poi biang ka juk ha kaba ka rep ka riang ka la kylla long ka kam kaba donkam tam na ka bynta ban pyndap ïa ka jingdonkam jong ki nongbam nongsa hapoh ka District. Kane ka long wat ha ka Jylla ruh jumjuh bad ki dei ban pynshlur ïa ka rukom rep khlem dawai, ka ban pynmyntoi ïa kane ka pateng bad ka pateng kaban dang wan namar ka kam rep ka ai bylla ïa kiba bun.
Ka jingrep phan ka dei kawei na ka kam rep kaba pynmyntoi ïa kiba bun namar ïa u phan la pyndonkam baroh shi aiom, kumjuh ruh ka kam rep tit kam thung soh bad kiwei kiwei.
Ha ka jingtyllun jong ka por wat ka jingthung syntiew ruh kam dei shuh tang hapoh kyrpong ïing lajong, hynrei ka lah dei ka por ban ïa tynjuh bor haduh ki rynsan kiba heh na ka bynta ban ithuh ïa jingtrei shitom jong ki nongrep. Lyngba ka Floriculture Mission shibun ki jingmyntoi ki nongrep ki lah ban ïoh lyngba kane ka skhim.
La pynkut ïa kane ka prokram da ka jingsam ïa ki khusnam sha ki nongjop kiba la wan ban pyni nam ïa ki jingthung jingthep jong ki, naduh u Pathaw, ka Kait, Kubi, Ngap, Sohñiamtra, Sying bad kiwei kiwei de ki jait jhur, ïa khusnam la sam lyngba ka tnat Horticulture, katba ïa ka khusnam ki nongjop ha ka jingïakop pyni nam syntiew pat la sam da ka Nongstoiñ Agri-Horti Society.
Ka prokram kaba kham heh shuh shuh jong ka ka KISAN MELA kan long biang ha ka 10 bad 11 tarik Nohprah 2025, kumta na ka liang ka District Horticulture Officer Nongstoiñ ka khot bad wer ïa ki nongrep ka District ba kin wan ban ïashim bynta shitrhem ha kitei ki ar sngi.
