Mynta khot ïakren ka sorkar ïa ki 3 tylli ki seng trok bad ki trai kharkhana dewbilat

Shillong, Naiwieng 12 : Hadien ba ka Meghalaya Commercial Truck Owners and Drivers Association (MCTODA) ka la bteng ïa ki jingïakhih jongka mynta la katto katne sngi, na ka liang ka sorkar ka la rai ban khot ïakren noh ïa baroh ki kynhun ne ki Seng jong ki trai, ki nongkhaïi bad nongñiah trok lashai ka sngi ka 13 tarik Naiwieng ha ka por 2 baje janmiet ha Secretariat.
Kat kum ka jingpyntip la ïathuh ba ïa kane ka jingïalang la khot da u Symbud Myntri Rangbah ka jylla u bah Prestone Tynsong uba dei khmih ruh ïa ka tnad kam pohïing ka jylla.
Ki seng kiba la shah khot ïakren ki long ka Jaintia Hilss Truck Owners Association (JHTOA) ,ka East Jaintia Hills Truck Owners and Transporter Association (EJHTOTA) ka Meghalaya Commercial Truck Owners and Drivers Association (MCTOA) bad ka Jaintia Hills Cement Manufacturers Association lem bad ki DC bad ki SP jong ki lai tylli ki district.
Ka jingthmu jongka sorkar ban khot ïa kane ka jingïalang ka long ban ïakren ïa pynbeit ïa kine ki jingeh ba ki trok ki ïa kynduh bad ki kharkhana dewbilat khnang ba kan ym mih shuh ka kynrum kynram nangne shakhmat.
Shuh shuh la ïoh jingtip ba ha kaba nyngkong ka MCTOA ka kwah ban ïa kynduh beit tang ma ka bad ka sorkar hynrei namar ka sorkar ka kwah ban ïa pynbeit lang bad baroh ki seng kumta ka la lum lang lashai ka sngi ïa baroh ban ïakren da kawei ka sur ïa baroh ki seng jong ki trok khnang ba kan ym don kano kano ka jingïasngewthuh bakla nangne shakhmat.