Shillong, Naiwieng 12 : U CEM ka KHADC, Bah Winstone Tony Lyngdoh ha ka sngi Balang u la pynphai nia halor ka jingkynnoh jong u President ka Congress Bah Vincent H Pala ba ka Voice of the People Party (VPP) ka la pynbun ïa ka jingdon ki check-gate kiba kylla long kum ki ‘ATM’ jong ka party.
“Nga tharai phi donkam ban pan jingshai na u hi. Nga la ïohi ïa ka jingkren jong u ba u kynnoh ba naduh ba wan ka VPP ha ka bor synshar ha KHADC, ki check-gate ki la kylla long ki ATM jong ngi”, la ong u bah Lyngdoh haba kren sha ki lad pathai khubor.
U CEM uba bat ruh ïa ka tnad Trade jong ka Council u la ong, “Ngi la lah ban tehlakam ïa ka jingbun ki check-gate, na ki 23 tylli, ngi pyntrei kam tang 10-11 tylli. Kumta, kumno un ong ba ngi pynkylla ïa kine ki khyrdop kum ki ATM jong ngi.”
U la kyntait ruh ban kren eiei shuh hynrei u la shu ong ba dei ban buh ïa ka jingkylli sha u Pala, u ba la pynmih ïa katei ka jingkynnoh.
Na ka liang u CEM u la pynshai ba ha ka por jong ka Executive Committee (EC) kaba mynshwa ki don 23-24 tylli ki khyrdop, hynrei kane ka EC kaba mynta ka la pynduna sha ka 10-11 tylli.
U la ong ruh ba ka jingkulmar ka lah ban dei namar ki bakla ïa ki khyrdop khajna ba pynïaid da ka tnad khlaw ne ki Syiem jong ki Hima bapher bapher.
“Na ka tnad Trade bad Revenue jong ka Council, tang katto katne ki khyrdop ki dang pyntreikam da ka EC kaba mynta. Ngi la pynskhem ba ngi donkam ban buh khyrdop, hynrei kine ki khyrdop kim dei kiba thymmai — ki la don la bun snem. Ngi shu peit ïa ka jinglah jong ki; lada ngi sngew ba donkam ban pyntreikam, ngin bteng ban pyntreikam bad lada ym i donkam ngi weng noh ïa ki.”
