Shillong, Naiwieng 10: U Lamphang ka Iingdorbar jong ka ri u Om Birla ula ai ka jingïaroh ïa baroh ki ïingdorbar Thaw Aiñ jong ka thaiñ Shatei Lam Mihngi namar ka jingbat ïa ka rukom pynïaid dorbar kaba rim, ban ïatai lang bad ïa shim rai haba pynshong nongrim ïa la ki jong ki jingdonkam bad ki jingangnud.
Haba kren ha ka Commonwealth Parliamentary Association (CPA) India Region, Zone-III Conference ha Nagalang Legislative Assembly ha Kohima, u Birla ula ong ba ki Ïingdorbar Thaw Aiñ ka thaiñ Shatei Lam Mihngi ki la pyni ïa ka jingaiti lut ban wanrah ïa ka jingtreikam kaba shai, kaba don jingkitkhlieh, bad ka riti synshar ba ïashim bynta lang, watla ka thaiñ ka la sakhi ïa ka jingkiew sted bha ha ki jingtei khamtam ha ki surok, ki lynti rel bad ki kad liengsuiñ.
U la ong, “Ki Ïingdorbar Thaw Aiñ ha ka thaiñ shatei Lam Mihngi kila buh ïa ka kyndon thymmai kumno ban ïathir ïatai bad ka synshar khadar kaba bha. Ka jingpynleit jingmut jong ki ha ka roi ka par ba kynthup lang, ka jingangnud ka thaiñ, bad ka jingïashim bynta lang u paidbah ba pyni ïa ka jingmut ba shisha jong ka riti synshar paidbah ka Ri.”
U la pynpaw ïa ka jingsngewskhem ba kane ka CPA conference ba ar sngi kan sei ïa ki jingai jingmut kiba kongsan ban pynkhlaiñ ïa ki tnad synshar paidbah, pynjanai ïa ki rukom pynïaid ïa ki Dorbar bad nang pynkhlaiñ ïa ka jingshaniah u paidbah ha ka synshar khadar.
Haba ong ba ïa ka jingïatreilang kaba khlaiñ hapdeng ka Sorkar Pdeng bad ka Jylla, u Lamphang ula ban jur ïa ka jingdonkam ban don ki jingïakren kiba tei hapdeng ki kyrdan jong ka Sorkar ban pynthkna ïa ka synshar khadar kaba kynthup lang bad ka bym shong kli kti.
