Nongstoiñ, Naiwieng 10: Ka ïew ka hat ka dei kaba kongsan bha na ka bynta ki paitbah ha kaba kin ïakynduh lang na ka bynta ki kam khaïi pateng, kamai kajih bad ka thied ka pet bad kaba kyntiew ruh ïa ki paitbah ha ka ïoh ka kot.
Kumta ka shnong Sawtalad kaba harud ka surok na Rambrai sha Mawdoh, wat la ka dang dei ka shnong kaba rit hynrei na ka bynta ka jingmyntoi jong ki paitbah ka thaiñ, ki la seng ïa kawei ka ïew kaba la tip kum ka ïew Sawtalad.
Ha kane ka lah sngi u blei u nongthoh khubor u la hiar sha katei ka ïew bad la ïoh ban ïakren sani bad u bah Bormanding Nonglang u ba dei u sordar ba nyngkong eh jong katei ka shnong Sawtalad, u ba dei ruh u nong ai jingmut ba nyngkong eh sha ka dorbar shnong ban seng ïa katei ka ïew ba thymmai.
Haba ïakren bad u bah Nonglang u la ong ba ka shnong Swatalad la leit buhai da ki shiphew tylli ki longïing ha u snem 2003 bad suki suki ki long ïing ki la nang bun bad haduh kine ki sngi ki la don kumba sawphew phra tylli ki long ïing.
Nalor kata u la ong ruh ba ha u snem ba la dep na ka liang ki rangbah jong ka shnong, ki la I donkam ba kin seng noh da ka ïew ha katei ka shnong, khnang ba ki paitbah kin ïoh lad ban kamai kajih bad ba ka ïoh ka kot jong ki nongshong shnong ka kiew. Kumta ki la pan jingbit na u Syiem ka hima Rambrai ha kaba u Syiem u la ai ka jingmynjur ban seng ïew ha katei ka shnong.
U bah Nonglang u la ong ruh ba hadien ba ka ophis jong u Syiem ka la mynjur, ma u ryngkat ki katto katne ngut ki rangbah kiba dei ki trai jong katei ka jaka kaba don harud surok ki la ïa mynjur lang ban pynlong ïa katei ka ïew.
Hadien ba la dep pynjari da ka notis ha kylleng ki jaka ba kan don sa kawei ka ïew kaba thymmai ha ka thaiñ Rambrai ka ban pynlong ha ka shnong Sawtalad, ki paitbah na ka thaiñ ki la kmen bha bad dei haduh ka 17 tarik jong u bnai Risaw mynta u snem, ba la wan ban plie ïa katei ka ïew da u bah Lurshai Kharbani MDC ka Rambrai Jyrngam constituency. Naduh ba la plie, la pynlong ïew haduh saw sien bad ka sngi ïew ka long beit hadien jong ka sngi ïew Rambrai man la ka taïew.
