Sei ka EKH ïa ki jingbam na u sohñiamtra ka EWKH ïa u soh Kiwi, NGH ïa ka kait

Shillong, Naiwieng 09: Ki 12 tylli ki distrik jong ka jylla ki la ïoh ïa ka kabu ksiar ban pyni nam ïa ki jingbam ba harukom kumjuh ïa ki tiar ba ki pynmih na ki distrik jong ki ha ka lympung pyni nam ba la tip kum ka Meghalaya Unboxed : One District One Product (ODOP) kaba la pynlong da ka Directorate of Food Processing ka sorkar jylla ha Wards Lake, Shillong.
Ha kane ka rynsan pyni nam, ka East Khasi Hills ka la pyni nam ïa ki marbam bad ki jingdih ba la shna na u sohniamtra bad ha kajuh ka por ruh ïa ki tiar thain kti kum ki kriah ki shang bad kiwei kiwei.
Na West Khasi Hills pat la pyni nam ïa ki marbam ba la shna na u sying ba kynthup ïa u sying ba la tylliat ni bad kumjuh ïa u sying tyrkhong. Na South West Khasi Hills pat la wanrah bad pyni nam ïa ka ngap kaba la thep bad song ha ki bilor ba la sop itynnad.
Ka Eastern West Khasi Hills ka la sei bad pyninam da ki marbam ba shna na u soh kiwi kynthup ïa ka umsoh bad ïa ka jam.
Na Ri Bhoi pat ki la wanrah bad pyni nam da ki jingbam ba bunjait bha ba la shna na u sohtrun bad kumjuh ki jain ba la thain na u ksai ryndia ne eri silk.
Katba na West Jaintia Hills bad East Jaintia Hills ki wanrah ban pyni nam da u shynrai Lakadong ba kynthup ïa u shynrai ba dang im bad uba la dep tylliat ni. Ka West Jaintia Hills ka la pyni nam ruh ïa ki khiew khyndew kiba la shna hi ha ka distrik.
Na rilum Garo, ka West Garo Hills ka la wanrah bad pyni nam da u cashew-nut ki kynja soh tyrkhong kiba long kynrei bad pawnam bha ha katei ka thain.
Ka East Garo Hills kumjuh ka South West Garo Hills pat kumba long ka Ri Bhoi ka la wanrah ban pyni nam da ki jingbam ba shna na u sohtrun kynthup naduh ka umsoh, ka jam bad kiwei kiwei.
Na ka liang ka South Garo Hills pat ka la wanrah da ki jingbam ba shna na u sohphan kynthup ïa u sohphan ba la dep tyllait ni bad tyrkhong, nangta ki kynja chip bad kiwei kiwei.
Katba ka North Garo Hills pat ka la wanrah da ki jait jingbam kiba harukom ba la shna na ka kait, kine ki kynthup ïa ki jingbam kum ki chip bad kiwei kiwei.
Ïa kane ka rynsan pyni nam ba ar sngi la wan ban plie pyrda da u Myntri ka tnad ka Rep ka Riang ka sorkar Jylla, Timothy D Shira.
U Myntri haba kren ha kane ka jingïalang u la ïathuh ba lyngba kane ka rynsan, ki paidbah na kylleng ki bynta ka jylla kin tip nangne shakhmat kiei ki jait jingbam, jait soh, ki jait tiar ne ki jait mar ba ki 12 tylli ki distrik ki pynmih ne ki rep.
“Kane kan ïarap ïa ki paidbah ban tip kano ka distrik kaba pynmih ïa ki jait soh, ki mar rep ne ki jait tiar bad kane hi kan ïarap wat ban kyntiew ïa ka dor ka mur,” u la ong ba ka Jylla mynta ka la lah ruh ban shalan bun bha ki mar rep shabar jylla bad wat sha kiwei ki ri ruh.