Guwahati, Naiwieng 08: Ka Myntri Kam pla tyngka jong ka sorkarpdeng ka Nirmala Sitharaman, ka la plie paidbah ïa ar tylli ki projek jingdon jingem ba kongsan ha Guwahati mynta ka janmiet – ka Gateway of Guwahati Terminal bad ka Jetty bad ka Brahmaputra Riverfront – Ka Sati Radhika Shaanti Udyan. Kine ki projek ki pyni ïa ka jingkut jingmut jong ka Sorkar ban pynim biang ïa ka leit ka wan jong ka Assam lyngba ki wah bad ban pynïasoh biang ïa ka nongbah bad ka Brahmaputra kaba khraw lyngba ka jingkylla kaba ïaineh ba pynshong nongrim ha ki briew.
Haba ai jingkren ha ka jingïalang plie, ka Myntri Kam Pla Tyngka ka la ai jingïaroh ïa kane ka jingthmu kum ka sienjam kaba wanrah jingkylla ha kaba kyntiew ïa ka jingpynïasoh kaba ïaineh, kaba bun rukom bad ban rakhe ïa ka jinglong jong ka Assam ha kaba ïadei bad ka kolshor lyngba ka jingsaiñdur ïa ki jaka sor.
“Ka Gateway of Guwahati Terminal kam dei tang ka jaka ba ïadei bad ka leit ka wan-ka dei ka jingpynpaw ïa ka jingthmu jong ka Assam na ka bynta ka jingkiew shaphrang. Kane ka projek kan kyntiew ïa ka leit ka wan lyngba ki wah, kan kyntiew ïa ka kam jngohkai pyrthei, bad kan plie ïa ki lad kamai kiba thymmai na ka bynta ki briew jong ka Assam,” la ong ka Sitharaman.
Haba ïadei bad ka projek harud wah, ka la ong ba “Ka Brahmaputra ka dei ka mynsiem jong ka imlang sahlang jong ka Assam ka jingkhie im biang jong ka Jylla ka don ka jingïadei kaba jan bad ka. Da kaba pynïasoh biang ïa ka nongbah bad ki briew jong ka sha ka wah, kane ka projek ka rakhe ïa ka dustur bad ka jingkylla.”
Ka Myntri Sorkar Pdeng ka la ïaroh ïa ki sienjam jong ka Sorkar Jylla ha kaba kyntiew ïa ki jaka sor kiba mynta na ka bynta ka Guwahati, da kaba kdew ba kane ka projek ka pynïasoh ïa ka kolshor bad ka teknoloji bad ka pynpaw ïa ka rukom treikam kaba don jingthmu ban pynbiang ïa ki jingdonkam jong ki nongshong shnong. Ka la ban jur ba ïa ka projek pynroi sor la pyntreikam da kaba pyrkhat bha, da kaba pynthikna ba ka kamai kajih jong ki briew ka thaiñ bad ki jingdon jingem tynrai kim dei ban shah ktah. Katba dang kyntiew ïa ka rud wah, la pynneh pynsah ïa ka ïew die dohkha ha Uzan Bazar bad ka dang treikam, da ka lynti rung kaba kyrpang ba la shna hapoh ka jaka rud wah ban pynsuk ïa ki nongtong dohkha ban bteng ïa ki kam jong ki ha Brahmaputra.
Ka Myntri Kam Pla Tyngka ka la ïaroh ïa ka jingïaid shaphrang ha ka kam Inland Water Transport (IWT) jong ka Assam bad ka la ban jur ïa ki jingmyntoi jong ki lad ka leit ka wan lyngba ki jaka shong um kum ka rukom kaba lah ban pynneh pynsah. Ka Myntri kam Pla Tyngka ka la lap ba ka jingkit mar kaba khia 24 ton ka lah ban ïaid 1 km ha ka 1 litar ka umphniang lyngba ka surok, 85 km da ka rel, hynrei kaba phylla ka long 105 km lyngba ki wah-kaba pyni ïa ki jingmyntoi jong ki lad ka leit ka wan lyngba ki wah ha kaba ïadei bad ka ïoh ka kot bad ka mariang.
Ka la ban jur ruh ïa ka mynsiem ïatreilang ha ka roi ka par hapdeng ka Sorkar Pdeng bad ka Jylla, da kaba ong ba u Myntri Rangbah u la shim ïa ka rukom treikam kaba la thmu bha bad kaba don buit ban kyntiew ïa ki karkhana ha Assam. Ka la pynpaw ba hapoh ka skhim jingïarap ba kyrpang sha ki jylla na ka bynta ka jingbei tyngka, ka sorkar pdeng ka ai ram khlem sut sha ki jylla na ka bynta 50 snem. Ha kaba ïadei bad kane, ka la ïaroh ïa ka jingtreikam jong ka Assam kaba la pyndonkam hok ïa kine ki pisa ha ka rukom kaba la thmu bad kaba seisoh.
Ka la ïaroh ïa ka jingïalam ba ïohi jngai jong u Myntri Rangbahduh ba donburom u Narendra Modi bad ka jingphaikhmat ka Sorkar Assam na ka bynta kan roi ka par hapoh ka jingïalam jong u Myntri Rangbah ka jylla u Dr. Himanta Biswa Sarma, da kaba ban jur ba kum kine ki projek ki pynpaw ïa ka jingthmu jong baroh ha ka ri ri ban tei ïa ka Viksit Bharat shuwau snem 2047 lyngba ka roi ka par kaba kynthup lang bad kaba ïaineh.
Haba ai jingkren ha kane ka sngi, u Myntri Rangbah ka Jylla, u Dr. Himanta Biswa Sarma, u la ong ba ka jingplie paidbah ïa ka Guwahati Gateway Terminal ka long ka sienjam kaba kongsan ban pynkhlaiñ ïa ka leit ka wan lyngba ki wah hapoh ka Jylla. U la pynpaw ba ka terminal kaba thymmai, kaba la biang baroh ki jingpynïasoh ba bun rukom, kan kyntiew ïa ki jingdon jingem ba ïadei bad ka leit ka wan jong ka Assam bad kan pynsuk ïa ka leit ka wan jong ki briew bad ka jingkit ïa ki mar ha shi lynter ka wah Brahmaputra.
U Dr. Sarma u la ai khublei ïa ka bynta kaba kongsan ba la leh da ka Myntri kam Pla Tyngka jong ka Sorkar Pdeng ha kaba kyntiew ïa ki jingdon jingem ba ïadei bad ka roi ka par ha Assam bad ha kylleng ka thaiñ Shatei Lammihngi, da kaba ban jur ïa ka jingkyrshan ba man ka por jong ka ha kaba kyntiew ïa ka roi ka par ha ka thaiñ.
Ka Sitharaman ka la ïakren ruh bad ki dkhot jong ki Self Help Group (SHG) kiba pynïaid ïa ki stall bad ki dukan bapher bapher kiba don ha ka Gateway of Guwahati Terminal bad Jetty.
Ha kane ka sngi la ïadonlang ki Myntri sorkar jylla, ki heh ophisar jong ka sorkar Assam bad kiwei kiwei ki kynrem ki lyndan.
Shaphang ka Gateway of Guwahati Terminal & Jetty
La shna da ka Assam Inland Water Transport Development Society (AIWTDS) hapoh ka Assam Inland Water Transport Project ba la bei tyngka da ka World Bank, kane ka terminal kadei kaba la biang lut katkum ki jingdonkam ka juk mynta, kaba lah ban treikam ha baroh ki jinglong ka suiñbneng, ba la shna ha ka jinglut kaba T.304.95 klur. La saiñdur khnang ban pynkylla ïa ki jingshakri jong ki lieng bad ki jingshakri na ka bynta ki nongleit nongwan, kane ka projek ka don ïa ka terminal building kaba katkum ka juk mynta kaba don ïa ka integrated command and control centre, ka observatory lounge, ka sewage treatment plant, bad ki lad ïada na ka ding kiba bha.
Ka jingpynwandur ba kyrpang jong ka kaba pynshongnongrim ha ka pontoon, kaba lah ban pynbeit ïa ka jingkylla ka um haduh 10.9 meter, ka pynthikna ïa ka jingtreikam kaba lah ban shah ïa ka jingshlei um, ha baroh ki jinglong ka suiñbneng. Shisien ba la pyntreikam, ka terminal kan long kum ka jaka pdeng kaba kongsan bha, kaba kyntiew ïa ka jingpynïasoh, kaba kyntiew ïa ka kam jngohkai pyrthei, bad kaba pynkhlaiñ ïa ka lad ka leit ka wan ha ka jaka sor kaba pynshong nongrim ha ki wah ha Guwahati.
Shaphang ka Brahmaputra Riverfront- Sati Radhika Shaanti Udyan
La pyntreikam hapoh ka Guwahati Smart City Project ha ka jinglut kaba T. 327.31 klur, ka Brahmaputra River front Development Project ka thmu ban pynkylla ïa ka bynta ba jrong 1.2 kilomitar jong ka rudwah sha ka jaka ïaid kai ha sor kaba itynnad. Ka jingshna ka don ïa ka surok bah kaba heh 15 meter, ki kper ba la pynitynnad, ki jaka ïaid cycle, ki jaka ïalehkai jong ki khynnah, ki jaka sumar, bad ki jaka khaïi pateng, ryngkat bad hynñiew tylli ki khyrdop rung ba don nongrim ha ka kolshor ba la pynshong nongrim na ka jinghiar pateng ka jinglong riewlum jong ka Assam.
Ka rudwah ka pynïasoh lang ïa ki jingdonkam ba mynta bad ka jingpynwandur ba la pynshong nongrim ha ka pateng, kaba don ki jingdro ba la shna dur kiba pyni nuksa ïa ki rishot Bamuni Hills ba pawnam jong ka Tezpur, kaba pyni ïa ka burom jong ka jingtei jong ka Assam.
