Shillong, Naiwieng 07: Ka Voice of the People Party ka pynrem jur ïa ka jingleh jubor jong ka Sorkar MDA ïa ki nongïalam bad ki dkhot jong ka Meghalaya Commercial Truck Owners’ and Drivers’ Association (MCTODA).
“Ka jingbom ka jingtied bad ka jingkem ka long ka kam leh jubor kaba ngi dei ban pynrem da baroh. Ka jingleh donbor bad jingleh riewkhlaw ka Sorkar ka la wanrah ïa ka jingtieng bad rit mynsiem ïa ki nongshong shnong jong ka shnong Mawryngkneng khamtam ki longkmie bad ki khynnah. Ka Sorkar MDA ka dei ban kynmaw ba ka dei ka sorkar kaba la jied da u paidbah na ka bynta u paidbah ym da u paidbah na ka bynta ki heh saipan jong ki kharkhana shna dewbilat,” ong u Nongaiktien ka VPP u Bah Batskhem Myrboh.
Ha ka kyrwoh u la ong, “Kaba lynngoh ka long ba ka sorkar ka hap ban ai jingïada la kum ki VIP ïa ki kali Kompeni. Kane ka rukom leh ka Sorkar kam dei kaba thymmai. Kum ban shu pynkynmaw ka sorkar MDA mynshwa ka la tied la bom jem ïa ki paidbah ha ka por ban pynlong ïa ka jingsngew paidbah ha kaba ïadei bad ka jingpynsngew paidbah ban pynheh ïa ka kharkhana shna dewbilat ha Thangskai, East Jaiñtia Hills District. Kumjuh ruh ka la ther bom pynsatkhmat ïa ki nonghikai bad ki nongdie dukan ha ki por ba mynshwa.”
U la ong ba ka Party ka ai khublei ïa ki paidbah nongshong shnong ka Mawryngkneng ki ba ïeng ban ïaleh pyrshah ïa ka jingleh donbor ka Sorkar. Kane ka pyni ka nuksa ïa kiwei ruh ba kam dei ban don ka synshar donbor ha ka ri synshar paidbah.
“Shuh shuh ngi kwah ban jur ba ka jingïakhih ba jai jai ka dei ka hok long briew man briew jong ki nongshong shnong bad sorkar kam dei ban ïuh roit ïa kata khamtam ha ba ka jingdawa ka long ka ba shongnia kumba long ka jingdawa jong kane ka Kynhun. Kumjuh ruh ngi dawa ba ïa ki nongïalam ba la shah kem dei ban pyllait mardor bad pyllait lut ïa ki na ki jingmudui pyrshah ïa ki,” ong ka kyrwoh ba la phah da u Bah Batskhem Myrboh Nongaiktien ka seng VPP.
