K a juk kaba mynta kaba ki kam sniew ki kam smeh ki long kiba jur bha ka kren shai kdar ba ka sorkar ka donkam ha ka ban thaw noh ïa ki aiñ ki kanun kiba khlaiñ bha haka. Kumba ka long mynta, ki aiñ ki kanun ba la dep ban thaw ïa ki, kim pat biang satia ba ka ai ïaka kynja jingsneng kaba tyngeh ïa ki riew bymman, kiba leh ïa ki har rukom ki jait kam pyntriem ki jong ki, kaba da shisha ka pynher syrngiew bad pynpar ïa u ñiangkhriat ïa uba bun ba lang jong ka imlang ka sahlang.
Kiei ki kam bymman ba kum ka jylla kam pat mad ne shem bad ïohi ïaka, kaba da shisha marsien pule ha ki kot khubor, sngew pynban kumba da ïohi shai bha ïa ki la kum ba peit ïaka khana ha ki phlim, kaba ym don pat ba lah ban ïa mutdur, ba kaei kaba la jia ka dei pat kaba la dep ban jia long shisha (true story).
Ha ka jingim briew, ka khmat ban ïa ïapbiej mar kylliang kynthei la shynrang ka don, hynrei haba la kham sngew shon than eh pat kata ka jingieit, ka mynsiem kam lah ban khlem da kwah ban tyrwa mar kylliang, khnang ban ïoh ban mad ïaka kawei pat ka kynja jingim kaba kmen bad kaba suk. Hynrei lada la kata ka mynsiem pat kam mon ne kam sngew don pat ïa kata ka mon, ha ka jingim longbriew hap ban pdiang pat ïaka.
Pynban ban shut bat ryngkhi sah ïaka, ne tad haduh ban da leh dusmon pat ïaka mynsiem ksiar ïaka mynsiem rupa, kaba la buh bad sam bynta kyrpang a u Nongbuh u Nongthaw, kata ka jingieit kaba nylla, kan kylla long pat ka jingtim ha kaba ki ruh nar jong ki bor ka aiñ, kin dei pat ki sngi bad ki snem kaban hap ban shong ban sah shirta jingim.
Kumba la dep pat ban maitphang lypa na kaba sdang, ki aiñ briew ïa kum kine ki riew bymman ka dang tlot ka dang synjor bha, namar ha kaba kut, k aiñ briew ka iaid bd ka kyllaiñ bha, ka bam por da ki bun bun ki snem, ban lah ha kaban ai ïa kata ka kynja bishar ïaka jait kuna ban pynshitom ïa ki riew bymman.
Dei haba ki aiñ briew ki synjor, ba ka mynsiem u bymman bad uba la la ngop ne kyrni ha ki kam ki bymman ki jong u, kam man thnad satia, hynrei shipor lah ban shong phatok, hynrei tang shu la lait, ka juh pat ka kam ka kynshoit bad ka pynshlur biang sa shisien naka bynta ban leh ïaka.
Haba jia pat kumne, ka imlang ka sahlang ka sngew triem ban ïohsngew ïa ki khana, ha ka juh ka por ba ka longiïng ka longsem jong u nongkam bymman, ka kylla shajit ne sah ïathuh khana ei pateng la pateng, ba naka ïing ka sem ka jong ki, don u riew thrang snam, u riew shong tyrut, uba la don teng ha ka met ka longrynieng ka jong u ïaka dak pjiar snam ha ka jingim wan longbriew ka jong u ha kane ka sla jong ka pyrthei.
Haba kren biang sha ki aiñ briew, ka donkam mynta ba kan don teng noh ha kane ka jylla, ïa ki kynja rai kiba tyngeh, khnang ba kata ka mynsiem shaniah ha u briew ha ki aiñ ki kanun kan dang ïai bteng ba kan don ha ka mynsiem jong u paidbah, lym kumta, lada ki ain briew ki iai long kiba synjor, ba dkarai ban ai ïaka jingbishar ba shong ñia shong hok, ki ïai long kiba slem, ha kaba kut jong ka sngi, u briew hi da lei lei un nym don jingshaniah shuh.
Aiu pat kan jia long lada u briew um don shuh ka jingshaniah ha ki aiñ ba la shna pat da ki para briew, kane ka dei pat ka jingkylli, kaba hap ban ïa pyrkhat ban shong sani bha, namar lada jia ba nangne shakhmat lada dang don teng ki jingjia kiba kham sngewtriem lehse ka aiñ briew kan sa leh pat ïa kaei kaba donkam bad kata hi ka long ba ha ka jingkem dom bad khluit u, ka rai ïa u nongkam bymman ka lah ba kan shu kut ei ha ka jingshu ïa bom ne ban tied shnong, kaba lehse kan kylla long kum ka kynja rai, kaba shu ïa shim bd rai beit hak dak na madan ha mdan.
Pynban ki kam pyntriem pynsmiej ïa ki khyllung, ki khynnah ne ki samla kam dei kaba jia tang ha kane ka jylla, pynban, kadei kaba jia lut ha man la ki kyndong ki kynshrot jong kane ka sla pyrthei, hynrei lada phai sha la ka jong ka jylla, kaba lehse kaba baroh baroh dang ïa don hala ki kynja jingngeit niam bapher bapher, bad ba dang tieng dang smiej ruh ïaka tyrut ka smer, ka pap ïaka sang, kaba dang bat dang kheiñ bha ruh ïa laka jong ka kheiñ jait ka kheiñ rukom, da lei lei kan nym lah ban bteng ban ïai pdiang ïa ki jingjia bym juh da kham bna koit,hynrei ka imlang ka sahlang ka hylla ka pyrta bad ka da ïambriew lem, ka dawa ruh ïa ki briew jong ka aiñ, ba mardor ba kin sei madan ïala ka kaiphod tohkit ne ban da wan shakhmat ban pynbna ïar sha u paidbah ïaka kynja pynshitom, kaba lehse kan long da shisha ka nuksa ïa kwei pat ba kin nym mlien ban leh hadien habud.
