Ym lah satia ban ai kajuh ka dor shabar u pud ka Jylla : Dy CM halor jingdawa ka MCTODA

Shillong, Naiwieng 05 : Ka Sorkar Jylla ka la pynpaw ïa ka jingbym lah ban pdiang ïa ka jingdawa jong ka Meghalaya Commercial Truck Owners and Drivers Association (MCTODA) na ka bynta ban don da ka dor ba long salonsar lang na ka bynta ki kali kit dewbilat kumjuh na bynta ki clinker wat shaduh shabar jong ka Meghalaya.
Haba kren bad ki lad pathai khubor, u Symbud Myntri Rangbah ba peit ïa ka tnad Transport Bah Sniawbhalang Dhar u la ong ba watla ka sorkar jylla ka la dep ban pynbna ïa ka dor hapoh ka jylla kumta kam lah pat ban pyntreikam ïa kine ruh shabar kiwei pat ki jylla kum ka Assam.
Kane ka jingkren jong u ka long hadien ba ka kynhun ki nongniah trok kamai hapoh ka lama jong ka MCTODA ki la pynlong da ka jingïakhih kaba la pynsangeh ïa ka jingshalan dewbilat bad clinker.
Na ka liang u Symbud Myntri Rangbah u la ïathuh ba ki la don ki kynhun kiba dawa na ki kompeni cement ban siew ïa ka dor ba la buh da ka sorkar ha kaba ki kompeni ki la kohnguh ban leh.
Katkum ka jingong jong u, ki synjuk na East bad West Jaintia ki la pdiang ïa kane ka rai bad ki kompeni cement katkum ka dor ba la buh da ka sorkar. Hynrei la ong pat ba ka MCTODA ka la dawa ba dei ban long kajuh ka dor wat shabar jong u pud ka Meghalaya.
U Symbud Myntri Rangbah u la pyntip ruh ba ka dor ba la kyntiew da ka sorkar ka long 11tyngka na bynta shi metric ton/per km ha ki surok ba siang rong bad 12tyngka shi metric ton/km na ka bynta ki surok ba kham sniew bad 14 tyngka pat na ka bynta ki surok kiba la kham sniew.
Shuh shuh u Bah Sniawbhalang u la ong ruh ba ka sorkar jylla kam lah satia ban pynmih ne pyntreikam ia ka dor na ka bynta kiwei pat ki jylla kum ka Assam.
Na ka liang jong u, u la pynpaw ruh ba u long uba kloi ban kynduh ia kitei ki synjuk watla u pynpaw pat ba kane ka ishu kam khaii hapdeng ki kompeni cement bad ki nongkit ïa kitei ki mar.