Ngan long ka sur jong phi ha Assembly, kular u HM Shangpliang ïa ki nonghikai

Shillong, Naitung, 03: U MLA jong ka Mawsynram Constituency u Bah Himalaya Muktan Shangpliang bad ka MLA jong ka East Shillong Constituency ka Dr. Mazel Ampareen Lyngdoh bad kynthup ruh u MDC jong ka Laitumkhrah-Malki Constituency u Bah Fantin Joseph Lakadong ha ka sngi Saitjaiñ ki la leit ban ai mynsiem ïa ki nonghikai skul Adhoc kiba sahmiet ha Parking Lot, kaba don markhap bad ka Addl. Secretariat, Shillong.
Katba u dang ïakren bad ki nonghikai, u Bah HM Shangpliang u ong, “ngan ïai long borabor ka sur na ka bynta jong phi ki nonghikai. Lada phi don kano kano ka jingeh ngan sa kren ma nga hapoh Assembly ïa ki jingeh jong phi.”
Ha ka jingïakren bad ki lad pathai khubor u Bah Shangpliang, u la ong, “nga wan ban pynsngew lem ïa ka jingdawa jong ki nonghikai Adhoc bad nga la ïoh ban ïaphylliew jingmut bad u President bad ki nongkitkam ka seng jong ki bad nga sngewthuh ba ka jingdawa ka dei na ka bynta ban pynkiew tulop T.18 hajar bad ïa ka jingpynkiew tulop kaba 5% manla u snem.”
“Katkum ka jingïathuh u President, ka Sorkar ka la khot ïakren bad ka la kular ban leh ïa ka kam. Nga ruh nga pynsngew lada ka Sorkar ka sngap ïa ka jingdawa nga tharai ka la biang bad lada ka Sorkar ka dang kylla bad kam pat pynurlong ïa ka jingdawa jong kine (ki nonghikai) ngi ruh ngin sa mih lang ban kyrshan ïa ka jingdawa jong ki,” ula ong.
“Kum u nongmihkhmat, ngan nang ïaid shakhmat ban buh ïa ka sur jong kine ki nonghikai hakhmat ka Sorkar,” la kular u Bah Shangpliang.
“Ka jingdawa jong kine ki nonghikai ka la neh naduh u snem 2019. Ngi lah ban sngewthuh ba ka Sorkar ka shu sngap,” u la ong bad bynrap, “lada ka Sorkar ka shimkhia hadien ba ki (nongïalam ka FASToM) ki la aiti da ka jingthoh, hynrei kaei ka daw ba ka Sorkar kam shym la leh eiei haba ïa ka jingthoh ki ladep ai ka shu jah la ka jah ka File jong ka Secretariat.”
“Namarkata, ki nonghikai ki sngewdiaw ïa ka jingleh mutlop jong ka Sorkar bad ka jingshong jong ki ha surok ka Sorkar kam shym peit mat bad kam shym la sngap,” la kynthoh u Bah Shangpliang.
Ka Dr. Ampareen ha ka jingïakren bad ki lad pathai khubor, ka la ong ba kum ka MLA kaba ïatreilang hapoh ka Sorkar Meghalaya Democratic Alliance (MDA) kan sa ïakren ïa kane ka jingdawa jong ki nonghikai skul bad u Myntri Rangbah ka jylla ynda u la wan phai na rilum Garo.
Ka la ïathuh ba ka jingwan jngoh ïa kine ki nonghikai ha kane ka sngi, ka long hadien ba la ïohi lyngba ka Social Media.
Ka la ong ruh ba ha ka sngi Thohdieng ka la ïakynduh ïa u Symbud Myntri Rangbah ka Jylla u Bah Prestone Tynsong ban ïakren halor ka jingdawa jong ki nonghikai.
“Nga dei tang ka nongïasaid na ka bynta jong kine ki nonghikai bad haduh kan treikam ka jingïasaid jong nga ruh ngam tip,” ka la ong bad bynrap, “ngan pyrshang, ngan peit, ngan khmih, ngan sngewthuh, ngan kren bad nga kyrmen ba ka Sorkar kan ym pynslem shuh ïa kane ka kam namarba kam bha ban ïohi ïa ki nonghikai kiba shu shong miet la bad step.”
Katkum ka jingsngew shimet jong ka, ka la ong, “nga sngew ba dei ban pynkiew ïa ka jingsiew tulop lada ki dei ki nonghikai, ki nongtrei sorkar bad ngim ym hun ba ki nongtrei kin shu ïoh ïa kajuh ka tulop bun bun snem. Ban shu kren ruh ngi dei ban tip naei kan wan kata ka pisa bad kumno ka Sorkar kan ïakren bad ki nonghikai namarbaka kam don jingmut ba yn ai (pynkiew tulop) mynta hynrei la shem snem phim ïoh shuh.”
“Ngan pyrshang napoh ka sem. Baroh shikatto ngi don shabar ka sem bad ngi don ka jingmut ban pyrta ha surok ha lynti ha synkieng bad mynta ngi don ka bynta kaba kham kyrpang namarba ngi don lang ha kajuh ka Sorkar bad lehse ngam tip kaei ka ban mih na ka jingpyrshang,” la kren ai mynsiem ka Dr. Ampareen.
Ka la ai jingmut ruh ba ladei ban don da ka polisi ka ban kdew ïa ki School Managing Committee kaba bthah ïa ki kyndon ban leh.
“Ka kthang bha ka mynsiem haba ki nonghikai kiba armet ki hap ban shim shuti da kaba hap siew pateng ïa ki nongleit hikai bujli na ka bynta jong ki, katba ïa ki nongtrei sorkar la ai shuti haduh hynriew bnai. Kane ka ktah ïa nga,” ka la ong.
“Ka Management Committee kan hap ban pyrkhat kyrpang ïa kine kiei kiei baroh,” ka la ai jingmut.
Ha kane kajuh ka sngi, ki nongmihkhmat na ka Voice of the People Party (VPP) ki la leit jngoh ïa kine ki nonghikai.