Shillong, Naiwieng 03 : U Myntri ka Tnad Pule Puthi u Ma Lahkmen Rymbui ula ban jur ba ka Sorkar Jylla kala pynleit jingmut bha halor ki kam ban pynbha lut ïa ki ïingskul da kaba la sdang mynta ban pyntreikam ïa ka Mission IV.
“Kane ka dei ka Sorkar ba nyngkong kaba ithuh ba ki ïingskul ruh ki dei kiba don jingïadei bad ka rukom ai jinghikai ba paka ïa ki khynnah” ong u Bah Rymbui haba ïakren bad ki nongthoh khubor ha ka sngi Nyngkong.
Ka Sorkar kala mang pisa ha ka Mission I,II bad III bad thmu ban sdang noh sa ïa ka Mission IV, kaba thmu ban kyntiew kyrdan ïa ki ïingskul ha ki 15,000 tylli ki skul Elementary hapoh ka Jylla.
U Bah Rymbui ula ong “Ka jingthmu jong ngi ka long ban ïohi ba baroh ki jingtei bala pyndonkam ban hikai ïa ki Khynnah ki dei ban long kiba paka bad kiba biang nadong nadong”.
Ka Sorkar ka don jingthmu ban kyntiew kyrdan ïa 150 tylli ki skul, kynthup 15 tylli hapoh ka ADB program bad maramot ïa palat 160 tylli ki skul.
Haba pynpaw ba ka jingpynbha ïa ki ïingskul ka dei ka kam kaba ïai bteng, u Bah Rymbui ula ong “Kam dei ka jingkylli ïa 100 lane 1000 tylli ki skul, ka dei ka jingkylli ïa 15000 tylli ki skul-ki skul shimet, skul Sorkar, skul ba ai jingïarap ka Sorkar, ki skul deficit bad kiwei kiwei”.
