Shillong, Naiwieng 02: Ïa ka jingpyninam ïa ki tiar ba la shna ha ki karkhana kaba 9 ne ka 9th District Industrial Exhibition ka la kutnoh, ha kaba ïa kane ka prokram la pynlong ha BADO Multi Facility Centre, Ampati, South West Garo Hills.
Kane ka jingpyninam ka don ka jingthmu ban kyntiew ïa ki sap ki phong jong ki nongshong shnong ha ki kam shna jingshna, nangta ïa kiba sengkam lajong, bad ki tiar ba la shna thymmai da ma ki.
Ha kane ka jingpyninam ki la don kumba 22 tylli ki dukan bad ki 24 tylli kiba sengkam lajong, kaba la pyni ïa ki jingshna bad ki tiar bapher bapher ba la shna da ki kti, nangta ki tiar ba la shu thaiñ bad ba shu suh da ka kti, bad ki jait jingbam ba la shet ba la leh hi da ki nongshong shnong ka thaiñ lyngba ki sap bapher bapher.
Ïa kane ka exhibition la wan ban plie da Additional Deputy Commissioner Dr WCR Marak ha ka jingïadonlang Joint Director, Commerce & Industries Department S. Paswet bad DCIC General Manager NFR Marak ha ryngkatlang bad kiwei kiwei kiba la shah khot sngewbha bad ki ophisar.
Na ka liang Additional DC la leit ban jngoh ïa ki dukan bapher bapher bad la ïasyllok bad ki nongshna tiar, bad la ai ruh ka jingpynshlur bad jingkdew lynti bad ha kajuh ka por la ai ka jingïaroh ïa ki kam ba ki trei ha kaba kane ka pyni ïa ki jingpyrshang jong ki ban shaniah beit tang halade bad ban long kiba janai.
Ïa kane ka jingpyninam la pynlong da ka ophis General Manager, District Commerce & Industries Centre (DCIC), Ampati, kane ka jingpyninam la khmih lynti ba kan pynïoh ïa ka lad ba kin die ïa ki tiar ha ki ïew, ban kyntiew ïa ki kam sengkam lajong, bad ban kyrshan ïa ka ïoh ka kot, ka kamai kajih kaba neh hapoh ka district. Kane ka rynsan ka pynsuk ïa ka lad ban don ka jingïatreilang, ka jingsam ïa ki jingnang jingtip, bad ka jingailad ban pynïaid ïa ki tiar na ka bynta ki karkhana barit bad ki self-help group ne kynhun rap lade.
Kane ka jingpyninam ka pynpaw ïa ka jingriewspah jong ka kolshor kaba hiar pateng bad ka jinglah ban kyntiew ïa ki kam karkhana ha South West Garo Hills, kaba wanrah lang ruh ïa ki kam pynmih tiar kaba pynïadei bad kiba mynshwa bad kiba mynta.
Ha kane ka jingpyninam, la don ki jingdie ïa ki jingbam bapher bapher, ki jingtem jingput, bad ka jingwan jong ki nongshong shnong ha kane ka prokram.
