Shillong, Naiwieng 02: Ka Department of Music, Martin Luther Christian University (MLCU) ka la pynlong ïa kiba bun ki jingai jinghikai ban tem ban put hapoh ka Mawlong Secondary School ha kine ki sngi ba la dep.
Ïa kine ki class la pynlong ha manla ka sngi Thohdieng kaba long ruh kum shi bynta na ka jingsdang ka MLCU ban kyntiew ïa ka jingnang jingtip ha ka music bad ka jingdonkam ban pynpaw ïa ki sap da ki samla pule bad ki khynnah skul.
Ha kane ka prokram kaba shi bnai kynthih, la ai lad ïa ki khynnah skul ba kin ïoh pyrshang ïa kiba bun ki tiar tem ba kynthup ïa ka piano, guitar, ukulele, Ksing bad ki lad ban rwai. Kine ki session ki tyrwa ïa ki khynnah skul ban mad ïa kiba bun jait ki jingtem kiba dei na la trai ri bad kiba nabar, bad pynshlur ïa ki ba kin ïaroh ïa ki jingdon bun jait bad jingïapher jong ki jait jingtem.
Na ka liang ka tnat ka la ong ba kine ki kam ki ailad ïa ki khynnah skul ba kin kiew ha ki rynsan ban shem bad ban pynbha ïa ki sap tem jong ki. La ong ba ïa kine ki kam la pynlong ha ka jingïatreilang bad ki skul bad ki jaka pule ban sam bad ban pynkupbor ïa ki samla ba kin kmen lyngba ka music.
