Shillong, Naiwieng 02: Ka Shnong Riatsamthiah kan long kaba donbok tam ha kaba hadien palat 40 snem ka jingangnud ban ïoh ïa ka surok na jingkieng Lawmali ka ban poi shaduh ka ïingmane Presbyterian Riatsamthiah kaba la mang ha ka dor T. 1.20 klur kaba dei ka grand in aid na ka tnat Pynroi Sor ka sorkar jylla bad ka ban pyntrei pat da ka Shillong Municipal Board.
Ïa kane la pynbna ha ka sngi Saitjaiñ da u MLA ka 17th North Shillong u Bah Adelbert Nongrum ha ka jingïalang ba lyngkot ha ka jingïadonlang ki ar Dorbar Shnong, ka Riatsamthiah bad ka Jaïaw Shyiap Lum Pyllon.
U MLA u la pynbna ruh ka jingmang pisa ban shna ka surok ïaid arshaka na Community Hall sha surok 108 Lawmali ba mang T. 1.69 lak bad ka Infrastructure Development (ID) ba dei ka skhim shna nala kaba long T. 1.26 lak tam bad tang ha Riatsamthiah baroh ka jingmang na ka bynta ka skhim long T. 3. 53 klur.
Haba ai jingkren u MLA u la ong ba kane kadei ka jingangnud kaba la bun phew snem hynrei mynta ka la urlong ba la ïoh ka jingmang pisa ban shna noh ïa kane ka surok.
U la ai ka burom ka Dorbar Shnong Riatsamthiah bad ki la treilang ban pynurlong ïa kane ka jingdonkam. “La slem bha na ka liang ka Seng Kynthei, ka seng samla bad ka Dorbar Shnong ki la pynpaw ïa kane ka jingdonkam bad nga la ong ïa ki ban long kiba ïaishah bad dei kane ka jingïaineh jong ki ban long kiba ïaishah ba la wan urlong kane ka jingdonkam jong ki ym kaba ki dawa ne kwah,” ula ong.
U la ong ba ka don ka por ban hap ban long uba pyrshah haba dei ban pyrshah bad ban ïaroh ruh haba don ka por ban ïaroh ïa ka sorkar haba ka leh ïa kaba donkam
“Nga ai khublei ïa u Symbud Myntri Rangbah ka jylla uba khmih ruh ïa ka tnat Pynroi Sor u Bah Sniawbhalang Dhar uba la sngap ïa ki jingtyrwa jong nga khlem da thew wat la nga dei u MLA uba don ha ka liang pyrshah, u la mang ïa kane ka pisa bad mynta kane ka jingangnud jong ka shnong ruh ka la urlong,” u la bynrap.
U la ong ba kine ki skhim ba la mang ki kontraktor kin sa sdang noh ban pyntrei ïa ka kam bad ym lah pat ban ïapeiñ ïa ka rukom trei kaba kin sa trei bad ngeit skhem ba kin trei bha bad ba kan dei ban long kaba neh.
“Nga dei tang u atiar uba phi hap ban pyndonkam bad kum u MLA pat ngan ai kajuh ka jingmang skhim sha kiwei pat ki shnong kiba hap hapoh ka 17th North Shillong Constituency,” bynrap u MLA
Katba u Rangbah Shnong ka Riatsamthiah u Bah M Kharkrang u la ong ba kane ka dei ka jingphoh sniew kaba la wan urlong shisha bad ai khublei ia u MLA uba la shim khia ban buddien ia kane ka kam haduh ba kan da urlong shisha.
Na ka liang u Rangbah Shnong ka Jaïaw Shyiap Lumpyllon u Bah Francis Mairom, naba kane ka surok ka ban pyntrei ka hap lang mar shilliang pud ka Dorbar Shnong Jaïaw Lumpyllon, u la ong ban don ka kali khlem ka surok kam long eiei bad ong ruh ba haba ïoh surok kan don beit ka jingma bad ka jingbha bad ruh ka jingdonkam ban maramot ïa ki street light ha ki shnong.
“Ngi la thoh la bun sien sha ka tnat ba dei khmih ban wan maramot noh ïa ki street light namar kan long ka jingshngaiñ bad ki la ïathuh ba kin sa phah ïa ki junior engineer hynrei haduh mynta kim khlem pat leh eiei kumta nga kyrpad ïa ki tnat ba dei peit ba kin wan ban shna noh ïa ki street light khnang ba kan long ka jingshngaiñ ïa ka shnong,” u la kyrpad.
Ha kane ka sngi la don lang ki nongshong shnong jong baroh ar Dorbar Shnong bad kiwei kiwei.
