Thok pylleiñ u Myntri Rangbah ïa ki nonghikai skul Adhoc ka Meghalaya

Hadien ba ka sorkar kam shym la pyndep ïa ka kular ba ka la khlei, ki nonghikai adhoc jong ka jylla Meghalaya kim banse ban mih surok biang sa shisien. Ha ka jingshisha, u Myntri Rangbah, Conrad K. Sangma ula kular ha ka 12 tarik, jong u bnai Jymmang ban ai ïa ka jingdawa jong ki nonghikai bad u la pan por ruh ban pyndep ïa kane ka kam hapoh ki lai tylli ki Cabinet Meeting. Phewse, kata kam shym la urlong satia! Kane ka jingleh jong u ka la pynsngewsih bad pynbitar shikatdei ïa ki nonghikai, namar ka dei ka sien kaba ar ha kaba u la shet kylla ïa ki. Kumta, halor kane ka jingthok jong u, ka FASTOM ka la bteng biang ïa ka jingïakhih ha ka janmiet jong ka sngi 28 tarik ha ka por 2 baje tad haduh ba ka sorkar kan da pyndep ïa ka kular halor ka jingdawa jong ki.
Hadien ba ki nonghikai ki la ïaisah hakhmat Secretariat, na ka liang ki bor sorkar lyngba ki majistor, ki la bthah ban kynriah jaka noh shawei pat namar la pynmih ïa ka hukum Section 144 CrPC naduh ka 28 tarik hi. Watla ka sorkar ka la pynjari ïa kato ka jaka, ki nonghikai kiba la dap tang da ka jingsngewkthang mynsiem kim shym la khih satia na katei ka jaka hynrei kim shym la pynthut satia ïa ka ïaid ka ïeng jong kiwei. Dei ha ka step jong ka 1 tarik Naitung ba ka sorkar ka la byrthen ban ai mukotduma pyrshah ïa ki lada kim phet nangtei ba ka la pynlong ïa ki nonghikai ba ki hap ban kohnguh ïa ban kynriah jaka noh. Hynrei ka la long ka jinglehbeiñ (oppression) pynban ïa ki nonghikai namar ka sorkar ka la phah shong ïa ki shisyndon hakhmat ka paiñkhana kaba don marsyndah bad ka Additional Secretariat. Hangne, ka la nang wanrah shuh shuh ka jingeh ïa ki nonghikai bapli kiba la hap ban ring mynsiem baroh shisngi ïa ka lyer iwtung kaba mih na paiñkhana. Watla katta ruh, khlem jingriej ki nonghikai ki ïaishah ïa kita baroh. Kaei kaba ngi ïohi shai hangne ka long ba ha kane ka jylla jong ngi, kane ka sorkar MDA ka pynïasyriem thik ïa kine ki nonghikai bad kito ki briew ba im jakpoh da kaba pynkhuid ïa ka eit ka jung jong kiwei!
Ka jingleh jong kane ka sorkar MDA, khamtam ka jingbym kitkhlieh ïa ka ïap ka im jong ki nonghikai naduh u Myntri Rangbah bad u Myntri ba dei peit ïa ka tnad pule puthi ka la long ka jingpynkhlemraiñ bad pynjahburom ïa ka dur ka dar jong ka jylla baroh kawei, khamtam ïa ka burom ka ijot jong ki nonghikai bapli. Kane ka jinglong ehrang jong kine ki Myntri ha kane ka sorkar mynta ka la pynbor ïa ki nonghikai ban thomlut ïa ka sang ha kaba da ki spah ngut ki nonghikai kynthei bad shynrang ki la hap ban thiah miet ha surok, hakhmat ka Secretariat ban shah ïa ki jingeh bad jingshitom kaba kim pat ju mad satia ha ka jingim jong ki. Ka long kaei kaei kaba ym lah satia ban mutdur ba kum kane kan jia ha ka jylla baieid jong ngi, ka jylla kaba la bna ha ka nam ka burom kum ka jylla kaba tip-briew tip-blei! Kaba i sangsot palat ka long ban ïohi ïa ki nonghikai kiba la tymmen ki hap ban mad ïa kum kane ka jingshitom.
Hapdeng kat kine ki jingeh, ki nongmihkhmat paidbah kum ki Minister bad MLA imat ki la shu khapbrip noh ïa ki khmat bad rieh ïa lade shwa ban rung hapoh Secretariat naba ki sheptieng ïoh don ki nonghikai napoh constituency kiba kum ïohi ïa ki! Mynta haba ki nonghikai ki la shong kham jngai, ym shuh pyrshah na ka ophis jong ki, kan ailad ïa ki ba kin ïohleh biang katba mon namar la lait na ka jingïohi ïa ka dur jong ki man ka sngi. Kaei kaba pawshai lyngba kane ka jingïakynduh jingeh jong ki nonghikai ka long imat lajan baroh ki nongmih-khmat paidbah kiba la wan khroh wan kjor ha shwa ka elekshon ha ki shnong ki thaw jong ngi, mynta haba ki nongkyrshan jong ki (nonghikai) kiba long ki nongtei ïa ka imlang sahlang bad ka jaidbynriew ki donkam ïa ki, pynban kine ki ‘lei san snem ki phai pynban da lyngkdong bad ki ïa kynud sur jingrwailang bad u Myntri Rangbah naba sheptieng ïoh poi sha ka duhnong ïa lade.
Kane ka jingleh jong kane ka sorkar mynta ka la wanrah shisha ïa ka jingsngewsih, jingsngewdiaw bad ka jingduh jingkyrmen ïa ki briew hapoh ka jylla baroh kawei. Lada ïa ki nonghikai ym don shuh ba kheiñ snep bad burom sa ïa pyrkhat ma phi kumno kan long ïa kiwei pat? Lada ngi kum ki nongshong shnong ngin ailad biang ïa kine ki jait briew ban shong ha ka ïingdorbar thaw-aiñ, wat nym ïa babe lane kynshi kyneh hadien lada ki khyrwait naphang ïa ka spah ka phew jong u paidbah bad lute lut katba don ha kane ka jylla jong ngi.