Hadien ba rung sha ka Congress, kiar u Zenith ban kren ei ei halor u Dr. Mukul

Shillong, Risaw 29 : U MLA barim ka Rangsakona u Zenith Sangma ha ka sngi Balang u la pynïasoh biang sha ka Congress hadien ba u la resain noh na ka All India Trinamool Congress.
Haba kren ha ka jingïalang pdiang burom ha Congress Bhavan, u Zenith u la kiar ruh ban kren ei ei halor u hynmen jong u ba dei ruh u Myntri Rangbah barim ka Jylla u Dr. Mukul Sangma la un wan lang neem ban pynïasoh biang sha ka party.
Haba kylli shaphang u Dr. Mukul Sangma na ka liang u Zenith Sangma u la ong ba u hynmen jong u, u la dei u nongmihkhmat uba la tbit bha bad uba don ka jingshemphang bad jingtip kaba bun, bad ka bha ban kylli na u halor ki jingthmu jong u.
“U dei u nongïalam uba la rangbah bha bad uba don ka jingtbit kaba la slem ha ka sain pyrthei, u ba don shibun ka jingnang jingstad bad ruh ka jingshemphang ” la ong u Zenith Sangma. “Kumta, kaei kaba u pyrkhat bad kaei ka jait jingpyrkhat ha ka jingmut jingpyrkhat jong u, dei tang ma u hi ba tip bha ïa kine.”
U Zenith Sangma u la kren shai ba um don bor ban kren na ka bynta u hynmen bad ba u Dr. Mukul Sangma un sa shim ïa ka rai la jong ha ka por kaba biang.
“Ynda la dei ka por, u lah ban shim ïa kano kano ka rai kaba shong ha ka mon jong u. Ngam kwah ban ïakren halor kane bad nga kyrpad ïa phi ban kylli ïa kane ka jingkylli tang ha u,” la bynrap shuh shuh u Zenith.
U Zenith u la ong ruh ba ka jingwanphai biang jong u sha ka Congress ka long ban ïakhun pyrshah ïa ka jingtreikam bym hok bad ruh ban pyllait ïa ki paidbah ka jylla na kane ka jingma.
Une u nongmihkhmat barim uba la don bad ka party la kumba 20 snem ei ei u la kynnoh ba kane ka sorkar ba mynta ka la pynsniew dur lut ïa bun ki bynta la ka long ha ka tnad bording, ka tnad pule puthi bad ruh ha ka koit ka khiah.
Nangta u ong ruh ba kum u nongmihkhmat u don ïa ka nongrim treikam kaba khuid bad u kob ruh ba lada don mano mano ba lap ei ei ïa ka rukom treikam jong u kum u Myntri Sorkar.
Ha kajuh ka por u MP ka Congress na Tura, u Saleng A Sangma u la pynpaw ïa ka jingkyrmen ba u Myntri Rangbah barim ka Jylla Dr. Mukul Sangma u lah ban wanphai biang sha ka Congress da kaba ong ba ka party ka pdiang sngewbha ïa baroh kiba kwan ban pynïasoh.
Haba jubab halor ka jingkylli, u Saleng u la ong ruh ba um kwah satia ban kren ei ei halor u Dr. Mukul Sangma namar ma u hi u la dep ban pynpaw ba um kwah ban pynïasoh sha ka Congress. “Kumta, ngi pdiang sngewbha ïa ka rai jong baroh,” u la ong.
U Saleng u la ai ruh ka jingïaroh ïa ka Deborah Marak kaba la trei shitom ban khring biang ïa u Zenith Sangma bad ka kynhun sha ka party.
Haba kren pat halor ka elekshon MDC kaban sa long shen ha Garo Hills Autonomous District Council (GHADC) u Saleng u la ong ba ka rai hi ka ong ha ki paidbah.
“Kam dei satia tang shaphang ka GHADC hynrei ka dei ïa ki paidbah ba kin sngewthuh ïa ka dor jong ka Khyrnit kaba Hynriew,” u la ong.