La kum ki masi ki blang ïa phngian ki khynnah tang ha kawei ka kamra ba rit ha LP School, Lumshken EJHD

Khliehriat Risaw 27: Ka long shisha kaei kaei kaba i sangsot haba peit ïa ka jinglong jingman ki hep rit kiba dei ki khynnah skul bad ki ar ngut ki nonghikai ha ka skul sorkar, ka Government L.P School kaba don ha shnong Lumshken East Jaiñtia Hills District ha kaba ki khynnah kiba don haduh 97 ngut ki la hap ban shu ïa shong khap ngiah tang hapoh kawei ka kamra klas kaba rit bad ki nonghikai pat ki hap ban ïa shim klas lang ha kajuh ka kamra bad ki hap ban hikai ruh ar tylli ki klass ha kajuh ka por.
Ia kaba kum kane ka jinglong jingman u Mawphor u la lap bad sakhi da la ki jong ki khmat ha ka jingleit jurip kaba dang shen ïa katei ka skul ha shnong Lumshken.
Ka shnong Lumshken ka dei ka shnong kaba la don haduh 228 tylli ki longïing ha shnong bad ka don katei kawei ka L.P School kaba la rim bha bad dang myn ha u snem 2011 ka shnong ka la seng noh kawei ka skul kaba naduh klas-V haduh klas-VIII ba la pynlut na ka pisa shnong.
Haba peit ïa ki khynnah ha ka por long skul ka long ka la i sangsot shisha ha kaba ki hap ban ïa shong khapngiah bha kumba san ngut ha kawei ka ben, ka buh jingeh bha haba ki thoh jingthoh, lah ruh ban ong ba kane ka rukom jinglong jingman ka kamra klas kam long kaba i koit i khiah ïa ki khynnah bad ïa ki nonghikai ruh kumjuh namar ka jingkhapngiah kaba la palat bad ka buh jingeh ruh ïa ki nonghikai ha ka por ba ki ai jinghikai ïa ki khynnah.
Shuh shuh la lap ruh ba ki khynnah rit pat kiba dang shong klas-A, Klass-B ki hap ban shu ïa shong kum ki blang ki masi hapoh ka kamra shet jingshet ne ka kamra Mid Day Meal kaba rit kaba don tang ar bad lai tylli ki ben ban shong bad ym don pat ka ben ban thoh jingthoh, hato kaba kum kane mo kata ka rukom jinglong ki skul kaba ngi khmih lynti pat ban kyntiew ïa ka jingnang jingstad hapoh ka jylla? Nalor ba kane ka skul L.P kaba don hapoh katei ka shnong Lumshkem ka dei kaba la seng naduh u snem 1958 naduh ka por ba dang ïa don lang bad ka sorkar Assam kaba la kynjoh mynta sha ka 67 snem.
Kawei kaba sngewkhia eh ka dei ka jingpep shul noh shiteng por jong ki khynnah ha kaba na ka liang u Secretary Shnong Lumshken u bah Yoowest Khaïi u la iathuh ba kane ka jingpep skul noh shiteng jong ki khynnah ka ju kynjoh haduh kumba 70 percent man la u snem bad ka daw hi ka dei namar ba ym don skul shuh hapoh shnong ba ki khynnah kin bteng ïa ka jingpule jong ki bad ban phah pule ïa ki khun sha jngai ruh kum sha Khliehriat, sha Jowai ka la ktah palat ïa ka jinglut jingsep jong ki kmie ki kpa kiba dang duna ka ioh ka kot.
Shuh shuh u bah Yoowest Khaïi u la iathuh “Barobor haba wan ki briew na ki tnat sorkar bad ki briew kiba na bar ruh kumjuh ki ju kylli ba balei ki nongshng shnong kim kiew ha ka pule puthi, balei ba ka duna ka bha ka jingnang jingstad ha shnong, nga mynjur ïa kata namar haduh mynta ruh ym pat don uwei ruh u nongshong shnong u ban trei kam sorkar bad ka daw hi ka dei namar ba ym don ka skul kaba biang hapoh shnong bad hangno hi kin ioh kam haba ki dang duna ka jingnang jingstad bad haba peit ba mynta la palat ïa ka hynriewphew snem ba la seng ia kane ka skul L.P hynrei ka dang sah hi kumjuh hi, kumta ngi buh ka jingkyrpad ïa ka sorkar ba kan sngewbha ban shna pynheh shuh shuh ïa ki kamra klas ba ki khynnah kin ioh jaka kaba kham kylluid ba kin ïa shong bad kumjuh ruh ba kan nym buh jingeh than ïa ki nonghikai namar haduh 97 ngut ki khynnah ki don kine ki ar ngut ki nonghikai ki hap ban hikai ïa ki ka long shisha ka kam kaba eh” u la kren ïa kane da ka jingsngew khia bad u la kyrpad ïa ka sorkar ba kan peit lem ïa kane ka skul khnang ba yn lah ban kyntiew ïa ka jingnang jingstad hapoh shnong.
U bah Yoowest Khaïi u la iathuh shuh shuh da kaba ong ba “Dei lyngba ki riew rangbah jong ngi mynshwa kiba dei ki nongialam shnong ki la shim ïa ka synjam bad seng noh da kawei ka skul ha u snem 2011 bad ha kane ka skul ka shnong ka la buh lai ngut ki nonghikai ha kaba la siew tulop ïa ki nonghikai da ka Dorbar Shnong, ha ka jingshisha kane ka ïing skul ka dei ruh kum ka community hall bad lyngba ka jingioh jingiarap lynga ka skim SRWP bad la pynlut ruh na ka pisa shnong, mynta ngi sngew kmen ba ngi la lah ban shna pynheh ïa kane ka skul ha iïng Community Hall bad pynwandur ïa ki kamra klas ban shong ki khynnah bad ki khynnah kiba pass na katei ka skul L.P School ki lah ban bteng ïa ka jingpule kaba naduh klas-V haduh klas-VIII ha kane ka skul ba seng da ka shnong, ka la long kaba i donkam eh mynta ban don noh sa ka Secondary School hapoh shnong khnang ba ki khynnah kin ioh lad ban bteng shuh shuh ïa ka jingpule hapoh shnong”
La ong ruh ba kane ka iïng skul Upper Primary School la pyniaid da ka Dorbah Shnong Lumshken bad ki riew rangbah jong ka shnong Lumshken ki pynpaw ka jing sngewnguh ïa u MLA ka thaiñ, u bah Kyrmen Shylla uba la iarap bad pynioh ki lad jingiarap lyngba ka skim MLA T5 lak tyngka bad kumta ki nongpyniaid shnong ki la lah ban shna bha ïa ka iing skul kaba naduh klas-V haduh klas-VIII.
U Secretary Shnong Lumshken, u pynpaw ruh ka jingsngewkhia ïa ka jingpynlong klas ïa ki khynnah kiba rit hapoh iïng Mid Day Meal namar ba kane kam dei kata ka kamra ban pynlong klas ne ban ai jinghikai ïa ki khynnah hynrei ym banse namar ba ym don jaka shuh ha ka kamara klas bad bunsien ki khynnah ki hap ban mih noh sha bar lada wan ki nongtrei Mid Day Meal kiba shet jingshet jingbam sngi ïa ki khynnah.
“Lada ka long ha kane ka rukom ka jingnang jingstad hapoh ka jylla kan nym lah satia ban kiew stet namar kumba ngi iohi ba ïa kane ka skul kaba la seng naduh u snem 1958 ruh ka dang long sah kumne haduh mynta imat ka sorkar kam shim khia eiei ha kaba iadei bad kaba kyntiew ïa ka jingnang jingstad” ong u Secretary Shnong, bah Yoowest Khaii.
U la iathuh ruh ba na ka liang ka shnong naduh u snem ba la leit ka la dep ban buh jingthoh ruh ha u Deputy Commissioner ka Eeast Jiañtia Hills District ha kaba ka Dorbar Shnong ka la pynpaw ba ka donkam ban don noh ïa ka ka iïng skul kaba biang hapoh shnong hynrei kane ruh kam pat seisoh satia.
Na ka liang u nonghikai, u Babu D.K Lyngdoh u la ong ba ha ka jingshisha ka Primary Level ka dei ban don haduh klas-V hapoh kane ka skul hynrei namar ba ka kamra klas ka rit palat kaba ym iahap shuh bad ka jingdon ki khynnah kumta hap pynglong noh tang haduh klas-IV bad ynda ki khynnah ki la pass ïa ka klas-IV ki leit bteng ïa ka jingpule sa ha ka skul shnong.
Kawei pat ka nonghikai, ka kong Drosila Lamo, ka la ong ba kim banse ban lehshitom ban shim ar klas ha kajuh ka por namar lada kim leh kumne kin nym lah ban pyndep ïa ki course.
La ong ruh ba ka shlem treikam kaba ju trei na ka bynta ka bha ka miat jong ki paidbah, ka Bosco Integrated Development Society (BIDS) ka ju phah iwei i nonghikai ban iarap lem tang shikynta hapoh katei ka L.P School ha Lumshkem, hynrei ym lah ban len pat ïa ka jingshisha ba dei kitei hi ki ar ngut ki nonghikai u Babu D.Lyngdoh bad ka kong Drosila Lamo kiba hap ban shim ïa ka jingkit kaba khia bad ka lyngkor ka jingkitkhlieh bad len ialade ban pyntyllun ïa ka kam kum ki nonghikai ban ai jingnang jingstad ïa ki khynnah rit ha shnong Lumshken.