Ym don jingma ei ei ruh em na ka AITC ha ka election MLA 2023 : Pala

Shillong, Naitung 02 : Ka Meghalaya Pradesh Congress Committee, Bah Vincent H Pala u la ong ba ka All India Trinamool Congress kan ym don jingma satia ha ka elekshon MLA ha ka jylla kaban long ha u 2023.
Haba kren bad ki lad pathai khubor, u Bah Pala u la ong ba bun ki la pynïasoh sha ka AITC hynrei kin don bun ruh kiban mih noh shen.
“Nga shem ba ki paidbah ki pynïasoh sha ka TMC na kiba bun ki daw lehse dei na ka daw ba ka don ka jingïakut bad lada ka TMC kam lah ban pynurlong lane lehse ba ki la ïoh ki phet noh ngim tip, tangba na kaei kaba nga ïohi ka long ba ka TMC kam don jingma ei ei ha ka jylla ha ka elekshon ban wan,” u la ong.
Katei ka jingkren jong u kadei halor ka rai jong ki saw ngut ki MLA ka AITC kiba la pep ban wan sha ka jingïalang jong ka party ha ka sngi ba u National General Secretary ka AITC u Abhishek Banerjee u wan sha ka jylla dang shen.
“Ki nongïalam mynta ki por kim ïasoh sha ka sainpyrthei na ka bynta ban shakri ïa ki paidbah hynrei ki wan sha ka politik na ka daw ka jingmyntoi shimet jong ki lane ki pynïasoh tang ban jop elekshon,” u la ong.
U Bah Pala u la ongruh ba bun kin sa phet noh na katei ka party kaba ïalam ïa ka sorkar jylla mynta, kata ka National People’s Party. “Hynrei kata hi kam da donkam eh tangba ka jingsngew jong ki paidbah ïa kano ka party, kata kadei kaba kham kongsan,” u la bynrap shuh shuh.