Kylluid war ka jaka ba ju ïeng ki trok na Byrnihat sha Jorabat hadien ka jinghiar khynra u SSP

Nongpoh, Risaw 26: Ka thaiñ Byrnihat haduh Jorabat kaba ki trok ki ju pynlong ka jaka ieng ha shilynter u surok bha mynta ka la kylluid war hadien ka jinghiar u Senior Superintendent of Police ha ka sngi thohdieng ban weng bad daiñ kuna lut ïa ki trok kiba ïeng ha kitei ki jaka hadien ka jingud jingnam jong kiba bun ki paidbah nongshong shnong khamtam ki kali kit nongpang namar ka jingdheng kali na ka jingbam jaka kitei ki trok ha surok bah.
La sakhi ruh ba naduh katei ka trok ki trok kim ieng shuh ha katei ka jaka namar kam dei satia ka jaka ieng jong ki ha katei ka jaka nalor ba kadei ka jaka kaba khapngiah bad ka jingdon bun jong ki kali ba leit ba wan.
Lah ruh ban kdew hangne ba u heh pulit ka Ri-Bhoi lem bad ka kynhun pulit kila hiar sha katei ka thaiñ ha ka janmiet jong ka sngi thohdieng ban beh krad lut ïa baroh ki trok kiba ïeng ha shilynter jong utei u surok kaba la buh jingeh ïa ki paidbah ba leit ba wan, namar bun na ki trok ki ieng ha katei ka jaka namar ba ka dang dei ka por ba khang ban rung kali heh sha Guwahati (No Entry), hynrei na ka liang utei u heh pulit u la bthah ïa ki trok ba ki dei ban leit ieng noh sha ki thaiñ Sonapur ha ka por ba dang khang kali heh sha Guwahati namar ba kam dei than ka surok kaba bun kali bad khapngiah.
Naduh katei ka sngi bun na ki paidbah kila ai ka jingïaroh ïa ka tnad pulit Ri-Bhoi kiba la shimkhia ïa katei ka kam namar katei ka jingeh kadei kaba la mad la slem da ki paidbah bad kane ka jingleh jong ki pulit kala pynsuk shikatdei namar u surok u la kylluid naduh katei ka sngi.
Na ka liang ki pulit ka Ri-Bhoi kila bthah ruh ïa ki paidbah ba lada ki lap ba ki don kiba leh pyrshah bad kiba pynieng beaiñ ïa ki kali, ki lah ban shon da ka dur ne ring video bad phah sha Police Control Room ha u number 6909300160 bad ïa ki nongïathuh yn buhrieh ïa ka kyrteng jong ki.