Mairang, Risaw 25: Kum ka jingthmu ban pynjanai ïa ka jingpynkhreh na ka bynta kino kino ki jingshah pynjulor ha ka mariang ne kiba mih na u briew, ka Ophis jong ka District Disaster Management Authority (DDMA) Mairang, ka la pynlong ïa ka prokram ai jinghikai kaba bniah kaba ar sngi ha ka 23 bad 24 tarik u Risaw ha Tirot Sing Memorial Hospital, Mairang.
Ka training ka kynthup ïa ka jingai jinghikai kumno ban pynkhreh ïa ka Hospital Disaster Management Plan, ka first aid, ka lad jingïada ha ka por ba pluh ding, ka jingwad ïa ki ba jah bad jingpyllait im ïa ki briew hadien ka jingshah lynshop na ka jing khie u jumai, ne ka jingpluh ding ha ki hospital bad ruh ka jingpyni paidbah ïa ka Hospital Mock Drill halor ki lad ïada ha ka por ka jingpluh ding.
Ka jingthmu ba kongsan jong kane ka jinghikai ka long ban ai jinghikai ïa ki nongtrei hospital, da ki sap bad jingtip kiba donkam ban pynkhreh ïalade, kumno ban leh lada jia shisha ka jingwan lynshop kum u jumai ne ka ding.
Haba plie ïa kane ka prokram, ka Medical Superintendent ka Tirot Sing Memorial Hospital ka kong W.Shangpliang, ka la ban jur halor ka jingdonkam ban pynkhreh na ka bynta ki jingjia bym poi pyrkhat kiba lah ban shim ïa ka jingim u briew. Ban pynpaw ruh ïa ka jingkordor jong ki jinghikai ki ban sa ïoh lyngba ka training, ka ban ïarap ban leh eiei ha ka por ka jingshah lynshop.
Ka jingpynkhreh lypa ïa ki lad ïada kan ïarap ban pynduna ïa ka jingshah ktah. Ka la ong ruh ba kum kane ka jinghikai kan pynlah ïa ki nongtrei jong ka hospital ban tip ïa ki rukom treikam ba thikna (SOPs) jong ka DM Plan jong ka hospital bad ban leh ïa kajuh ka rukom ha kino kino ki jingjia ba sngewsih kum ka jingkhynñiuh jumai, ka jingpluh bad kiwei kiwei.
Kiba la ai jinghikai ha kane ka training ba ar sngi, ki kynthup ïa ka Kong S.A Lyngdoh Joint Director DHS (MI) Shillong, u Bah J.Mawthoh DDMO, na ka Fire & Emergency Service, Mairang. Ki jinghikai ki long halor ka phang ba kongsan kum ka jingpynkhreh ïa ka DM Plan jong ka Hospital, kumno ban leh ïa kiba la mynsaw. Ka bynta bad ka jingkitkhlieh jong ki kynhun na ka hospital ki ban ïarap ha ka por ba jia ka jingshah lynshop ka hospital ha u jumai ne ka ding, ka jingïada na ka ding & ka jingpyndonkam ïa ki tiar pynlip ding, bad ki rukom wad bad pyllait im ba la shna kyrpang.
Ha kane ka prokram ai jinghikai la wan ban ïashim bynta da ki nongtrei jong ka Hospital bad ki nongtrei na ka Hospital Holy Cross, Mairang bad ka Makarios Medical Centre, Mairang, kiba la ïoh ïa ki jinghikai kiba bniah kumno ban pyntreikam ha ka por ba shah lynshop ka hospital. Ha kane ka juh ka sngi la pynlong ïa ka Hospital Mock Drill halor ka jingïada na ka jingpluh ding ha ki Hospital.
