Shillong, Risaw 26: Ka kaiphod jingtohkit ba la leh da ka bor pynïaid distrik ka la shem ba kam don satia ka jingkhlong Uranium ha South Garo Hills. Kane ka la wan hadien ba u Vice President ka State BJP u Bernard N Marak u la kynnoh ba ka don ka jingkhlong ne tih ïa u marpoh khyndew Uranium bad kumjuh ruh ka jingkit ïa u na kane ka thaiñ.
Ka kaiphod ka ong ba ka bor pynïaid distrik ka khlem ïohpdiang ïa kano kano ka jingujor haba ïadei bad ka jingtih ïa u Uranium.
Lah ban ong ba ïa kane ka jingtohkit la leh da ki Officer-in-Charges ha la ki jong ki pud ki sam, kiba la pyndep ïa ka jingtohkit ïa kane ka kam da ka jingïarap ki rangbah shnong (Nokma) bad kiwei kiba la heh la san.
Katkum ka kaiphod ka ong, “Ym shym la lap satia ba ka don ka jingkhlong ne tih ïa u Uranium hapoh ka South Garo Hills ne ka don kano kano ka jingujor kaba la ïohpdiang na ki paidbah ne ki sengbhalang halor kane ka kam hapoh ka distrik.
Ka tyllong khubor kaba thikna la ïathuh ba ka la don ruh ka jinglum ïa ki sakhi bad ki jingpynshisha ïa ki jingkynnoh, hynrei ym don napdeng jong ki, kiba lah ban ai kano kano ka jingtip halor kane ka phang.
Ka tyllong khubor ka ïathuh ruh ba ki ophis kum ka Block Development Office jong ka Baghmara, Chokpot, Gasuapara, Rongara bad Siju ki la don bynta ban lum ïa kane ka kaiphod jingtohkit.
Lah ban ong ba u Marak u la kynnoh ba ka don ka jingtih ïa u Uranium ha Garo Hills, kaba long ruh shi bynta na ka Fact Finding Report kaba la aiti sha ki nongïalam ka sengkmie ka BJP, kaba ha kaba nyngkong ka pynleit jingmut halor ka jingtih dewïong pathar ha ka jylla.
U la kam ba ki jingshem ha kaba nyngkong la kdew ba la pynkit ïa ka tiar radioactive ba khyndiat sha ki kynhun shimet da kaba pyndonkam ki kali kiba biang.
Ha kawei ka liang, halor ka kaiphod tohkit, ka la paw ba kam shym la don ka sakhi ban kynshan ïa kine ki jingkam. Ki jingshem jong ki bor pynïaid ki ai jingmut ba kam shym la don ka kaiphod jingjia ba tih ïa u Uranium bad kam don satia ka jingujor ba la ïohpdiang na ki paidbah ne na ki sengbhalang.
