Nongpoh, Risaw 26 : Tang na ka daw ka jingñiah khlem akor kawei ka Kali rit bad ha ka jingpyrsang ban kynriah ban lait na katei ka Kali rit, kawei ka Trok ka la kylla syndon ha ka surokbah kaba la jia mynta ka sngi U Blei ha ka por 12 baje ei ei mynsngi ha Umsamlem ba hap ha ka surokbah National Highway-6 ha Ri Bhoi District.
Iane ka Trok kaba la kylla kynsan ha katei ka surokbah ka don ïa u number NL 07 AA 4963, ha kaba la ñiah da u Nasir Ahmed Choudry bad la don lang u nongbut ba la tip kyrteng kum u Rashit Ahmed ha kaba baroh ar ngut ki dei na Silchar, Assam.
Kumba la ioh lum jingtip, kane ka Trok kaba la kylla ha katei ka surokbah ka dei kaba kit ïa mar bam naduh u khaw, ki jingbam chip bad u Chocolate bad kane ka Trok ka la kylla noh ha ka jingkiar ïa katei ka Kali rit kaba la ñiah khlem akor da u Dribar bad uba la phet krad na katei ka jaka.
La ïathuh ruh ba ha kane ka jingjia, donbok u Dribar bad utei u nongbut kim shym la mynsaw ei ei bad lait noh ka jingsniew noh kitei ki marbam hadien ba la kylla ha ka surok.
Shuh shuh, la ong ruh hadien ka jingkylla katei ka Trok utei u dribar ka Kali rit u la phet noh na katei ka jaka bad na ka liang u dribar katei ka Trok u la pyntip noh mardor sha ki Pulit ka Umsning kiba la wan ban tohkit halor kane ka jingjia ba katei ka Trok ka la kylla ha ka surokbah.
