Shillong, Risaw, 22: Ka seng kieng atiar Hynniewtrep National Liberation Council (HNLC) ba la shah khein beaiñ ka la pynrem jur ïa ka jingkren jong ka Director General of Police (DGP) ka Kong Idashisha Nongrang.
“Ki kyntien jong ka ki pynpaw tang haduh katno ki katto katne ki riewshimet kiba don ka snam Hynñiewtrep ki la jah rngai na la ki jong ki tynrai bad ka jinglong bashisha. Ka long kaba sngewsih haba kawei na ki jong ngi ka jied ban long ka shyntur jong ka bor ba nabar ym ïa ka sur jong ki briew jong ka hi,” ong u General Secretary ka HNLC u Bah Saiñkupar Nongtraw ha u kyrwoh ba la pynmih ha ka sngi Balang.
Ka HNLC ka shim ba ka jingkren jong ka DGP ka dei ka jingthmu ban pynduhjait ïa ka jingïakhih kaba dei hok ban ïoh ïa ka synshar khadar u Hynñiewtrep bad ka jingpynpaw ïa ka jingieid ïa ka ri India ban ïa ka jaidbynriew Hynñiewtrep.
U Bah Nongtraw u la buh jingkylli ruh ïa ka jingkdew jong ka DGP ïa “ka rukom synshar jong ngi bad ka ri jong ngi,” da kaba kylli ïa ka rukom synshar bad ka ri jongno ba ka kdew.
U la kam ba ka jaidbynriew Hynñiewtrep kam ju pyndem ïa la ka jong ka jinglaituid lane pdiang ïa ka jingsynshar ki nongwei, bad ba ka jingdon jong ka HNLC kam dei ban pyni ïa ka jingdon lyngba ki jingleh donbor, hynrei ban pynneh pynsah ïa ka jingdon jong ka jaidbynriew Hynñiewtrep ha ka saiñ hima sima khlem sangeh.
U nongïalam ka HNLC u la pynpaw ruh ba ka kynhun ka long kaba la khreh na ka bynta ka jingïakren ïasuk hynrei ka dei ban pynshong nongrim ha ka jingïaburom markylliang bad ka jingithuh da saiñ hima sima kaba shisha, da kaba ithuh ïa ka jaidbynriew Hynñiewtrep kum ka jaitbynriew kaba kyrpang bad ka seng kaba ïaryngkat ha kano kano ka jingpynbeit.
“Ka HNLC kam don ban ‘pyni ïa ka jingdon’ lyngba ka jingleh donbor, hynrei ban pynneh ïa ka jingdon jong ka saiñ pyrthei kaba khlem sangeh jong ka jaitbynriew Hynñiewtrep, ka jingdon kaba ieng shabar ka jinglah jong ki suloi jong ki ne ki aiñ jong ki. Ngi la pynpaw bunsien ïa ka jinglong ba la pynkhreh jong ngi na ka bynta ki jingïakren jingsuk kiba la pynshong nongrim ha ka jingburom markylliang bad ka jingdon jong ngi kum ka jaitbynriew kaba kyrpang bad kum ka kynhun kaba ïaryngkat ha kano kano ka jingpynbeit, ym ka jingshah pyndem hapoh kaba la khot ka riti synshar India kaba dang ïai bteng ban kyntait ïa ka jinglong jaitbynriew jong ngi,” la ong u Bah Nongtraw.
