Hadien ba ka Peace Committee ne ka Committee pynneh ïa ka shongsuk shongsaiñ ha khappud Meghalaya bad Assam ki la lah ban wanrah biang ïa ka jingiasngewthuh jingmut bad jingïashongsuk shongsaiñ biang ha khappud Lapangap bad ka Karbi Anglong ka la donkam mynta ïa ki ar sorkar jylla ban shim khia noh ban pynkloi noh ban pynbeit ïa upud u sam khnang ba kan ym don shuh kano kano ka kynrum kynram namar khlem pep haba ki paid khappud ki tip shai ba kano ka jaka ba hap sha Assam bad kano ka jaka ba hap sha Meghalaya kan ym don shuh ka jingkulmar bad jingia kynad bad khlem pep ka shongsuk shongsaiñ kan neh shirta.
Ka jingjia jong ka jingïakynad ha Lapangap ha kine ki khyndiat sngi kaba la wanrah ka jingduh noh ïa kawei ka mynsiem briew ka dei kawei na ki jingjia namar ka jingbym pat lah ban pynbeit ïa u pud u sam. Kawei na ki daw ka dei ba ki Karbi ki shim kabu namar ba kiba bun ki jaka rep jaka riang jong ki nong Meghalaya ki hap sha u pud u sam ka Block I kaba dang don hapdeng ka jingïakajia haduh mynta bad kaba ym pat lah ban pynbeit satia.
Mynta ka sngi la rai ba ki nongrep na Lapangap ki lah ban leit ot noh ïa u kba uba ki rep sha ki bri kba ne lyngkha kba jongki ba hap sha ki thaiñ khappud. Lada ong sa mano mano ruh ka Lapangap ka dang dei hapoh u pud u sam ka Meghalaya kam pat hap hi ruh sha Block I hynrei ka shu don ha khappud bad ka Karbi Anglong kumta ba ka Assam kan kam ba ka Lapangap ka dei ka jongka, ka sorkar jylla Meghalaya ka dei ban ym ailad da lei lei ruh.
Ym dei ba pynshit hynrei ka long ka jingshisha namar kiba im ba sah ha Lapangap ruh ki dei ki paid Pnar. Kam mut ba ka Meghalaya kan pyni da ka bor hynrei kaba kongsan ka long ban ïasaid da ka nia ka jutang ryngkat ki sakhi ki sabut kiba biang. Hooid ka Assam ka la sdang bunkam namar ka la pynkhreh ia ka election MLA jongka ka ban long ha u snem ban wan hynrei na ka liang ka Meghalaya ka dei ban tynruh noh kloi kloi ïa ka Assam ban pynbeit noh ïa kane ka kam katba dang rhem ka ding khnang ba yn lah syndon ban pynlip ïa ka ding kaba klang na ka por sha ka por ha katei ka thaiñ Lapangap.
Ban phai sha ki bynta khappud ka long ruh kaba sngewsangsot nalor ba ki paidbah ki ïa kynduh ïa ki jingeh ba dei na ka daw u pud u sam, hynrei haba phai ruh sha ki kam pynroi kiba bun ki shnong ha ki jaka khappud ki dang sahdien shisha ha ka lïang ki kam pynroi.
Kum ka sorkar kaba long ka kmie ka la dei ban phai khmat kyrpang noh sha ki paidbah ha khappud kata ban peit kyrpang naduh ki jingdonkam ha ki lynti ki synkien, ki umbam ki umdih, ki bording ilektrik, ka pule ka puthi, namar lada ka don ka kam pynroi ha ki jaka khappud ka long ruh shibynta ba ka sorkar ka lah ban ïada ïa u pud u sam bad kumjuh ruh ba ki paidbah kin dangroi ha ka ïoh ka kot, ka pule kaputhi bad ha baroh ki lïang jong ki kam pynroi ba u paidbah u donkam.
Na ka por sha ka por ruh ka sorkar ka ju pynbna paidbah ba kan shim khïa kyrpang na ka bynta ki paidbah ha khappud, hynrei kumba long haduh mynta kata ka thong ba la buh da ka sorkar ka la kut tang ha ka jingïakren bad khlem da leh da ki kam. Ban roi jylla bad ka ri, ka sorkar ka donkam ban phai khmat kyrpang na ka bynta ki paidbah ha ki jaka khappud bad lada kum ka sorkar ka kloi ban kit ïa ka eh ka shon bad ka jingsahdien jong ki paidbah, khlem pep kan long ruh ka jingkyrkhu ïa ka jylla ka ban lah ban kiew sted ha ki kam pynroi kumba kiwei kiwei ki jylla jong ka ri ki la kiew sted bha ha ka liang ka roi ka par bad ka ïoh ka kot. Ka la dei ruh ka por ba ym tang ka sorkar kan phai khmat ïa ka jingeh ki paidbah ha ki jaka khappud, hynrei naduh ki nongïalam seng bhalang, ki riew rangbah ba paw khmat ka jylla ruh ki dei ban noh synnïang da kaba ïa trei lang bad ka sorkar shibynta ban kyntiew noh ïa ki shnong ki thaw kiba dang sahdien ha ki jaka khappud.
Nalor kata ka donkam ruh ïa ki bor synshar shnong ha ki thainñ khappud ban wan tynruh bad kyrpad na ka por sha ka por ïa ka sorkar khnang ba kan leh ïa kaba donkam namar teng teng lada shu sngap ka sorkar ruh ka kum klet ban leh ïa kaba ka dei ban leh ha ki thaiñ khappud.
