Dei ban ai burom ïa ka AMTTA ba la ïoh kit tourist na Umtyngar, ha ka jingshisha lah dei naduh ISBT Mawïong

Lada ka jingiakren kan ïaid katkum ka kam, kumta kane kan dei ha ka sien nyngkong tam, ba kane ka sorkar Meghalaya Democratic Alliance (MDA) kan pyni ba ka dang don malu malu ki shyieng budlum jong ka bad katei ka dei, ba ka shim rai ban set ïa ki kali Assam ha Umtyngngar bad ba ki kali trai shnong, kin leit sha Sohra bad lehse sha Dawki bad sha kiwei de ki jaka.
Ka mat kaba la dei ban leh la slem bah, namar ba ki kali Assam, ki la poi lut sha ki shnong ki thaw, ki dong ki lad, ki kyndong kynshrot bad kam dei tang ka jingma ïa ka leit ka wan ki kali, hynrei ki surok sha ki shnong ki dei kiba khim haduh katta katta bad na ka daw jong kitei ki kali kiba leit shangkai, ka thut ka leit ka wan, ka ïaid ka ïeng bad ka buh jingma ruh ïa ki trai shnong, kiba leit sha ki bri ki bsah, sha ki ïew ki hat.
Lada katei ka mat kan urlong, ka burom kaba nyngkong eh, kan leit sha ka seng jong ka All Meghalaya Tourist Taxi Association (AMTTA) kaba la pyni ïa ka jingshlur jong ka, ha kaba ka la bat ïa ki kali kamai ha Umtyngngar, nangta ha Umïam, nangta ha Jorabat nalor kiwei pat ki jaka, na ka bynta ban pynkhlaiñ ïa ki jingdawa jong ka, ban khang noh ïa ki kali Assam ba kin leit sha ki jaka shangkai jong ka ri Khasi Jaiñtia bad nalor kata, ka burom kaba kham khraw, kan leit sha ki trai jaka, kiba don ha kitei ki thaiñ, namar ba kin ai sngewbha ïa ka jaka kaba 40 akar, na bynta katei ka jingthmu ban khyllie ïa ka kamai kajih ki trai shnong, kiba buh kali.
Ka mat ka long kaba donkam eh shisha bad ngin ïa peit ha kine ki sngi ki ban sa wan, la katei kan urlong ne em ha madan bad na bynta kane, ka donkam ka jingkitkhlieh jong ki nongñiah kali, ki trai kali, ki nongmihkhmat lada dei ki MLA/MDC jong katei ka thaiñ bad ba kin ai ka jingkular kaba thikna bha sha ki trai jaka, ba kin nym shu bret kai ïa katei ka pisa, kaba da ki spah klur antad (ha ka por kyrduh jaka ha kine ki sngi), da kaba ai sha katei ka tnat sorkar, hynrei ba kin ïoh ban khyllie ïa ka bai jaka puta jongki, da kaba kin lum ia ka bai ïeng kali, lane kin don ïa ki dukan sha dukan ja bad ki dukan leit bar jong kiba pyndonkam ïa katei ka jaka ïeng kali.
Lada katei ka jaka ïeng kali, ha Kyrdemkhla, kan ïaid beit, kumta kan sa khie ka kamai kajih, ki trai shnong bad kin sa ïoh jingmut ban ïa kamai kali sha kiwei de ki thaiñ.
Lah ban pynkynmaw ba ha ki bnai ba lah dep ki kali kamai tourist na jylla Assam ki la pyneh hi triang ban kyntait ïa ka kwah ki kali tourist na Meghalaya ba dei ban shah ïa ki kali tourist Assam ba kin sangeh noh tang ha Khanapara, Jorabat, nangta ki la pynrem shuh shuh ba ki kali tourist Assam kidei ban pynhiar noh ïa kiba kwah leit Jngohkai sha ki jaka khasi Jaiñtia Hills tang hapoh ISBT Mawïong khnang ba kin lah ban kit hi noh ïa ki tourist, hynrei kane ruh kam shym la urlong satia ha ka jaka ba ka sorkar kan mynjur ïa kane ka mat bad jingdawa kaba don nongrim hynrei ka rai pynban ban ailad ïa ki kali tourist Assam ba kin pynhiar passenger shaduh Umtyngar, Mylliem.
Haoid wat la kane ka jingrai jong ka sorkar ha ryngkat lang bad ki nongïalam ka AMTTA ban mynjur ïa kane ka jingai jingmut kaba long kum ka sienjam ba la urlong katto katne ki jingdawa, hynrei kane ka jingailad shaduh Umtyngar Mylliem pat ka long kumba la dep ïoh kamai jem lypa ki kali tourist Assam kaba la long lypa kumba 3 pawa katba ki trai kamai kali tourist na jylla Meghalaya pat ki ïoh tang khyndiat ne tang shi pawa.
Ha ka jingshisha ka jingdawa ban phah pynhiar passenger noh haduh ISBT Mawïong ka long kaba long Pdeng bha ha kaba ka kamai kajih kan iasynriem mar kajuh, hynrei mynta lei lei la ïoh sngew ba ka sorkar jylla ka la pynbiang syndon da ki jaka ïeng kali kiba paka bha ïa ki kali tourist Assam ban ïeng khlem jingshah pynthut, katba ngin tip pat la ki kali kamai tourist na ka jylla Meghalaya ki ïoh lang ne em ïa kane ka juh ka jingshah burom sha Guwahati Assam.