Dawa phah tohkit CBI ka HYC na u Lamphang ba torti ki rukom trei ia ka Assembly ba thymmai

Shillong, Naitung 01: Ka Hynñiewtrep Youth’s Council (HYC) ha ka sngi Thohdieng ka la aiti da ka dorkhas ha u Lamphang ka Ïingdorbar Thawaiñ ka jylla u Bah Metbah Lyngdoh ban dawa ba dei ban aiti noh ïa ka jingtohkit sha ka Central Burau of Investigation (CBI) halor ka jingtrei torti bad ka jingbym bud ryntih jong ka tnad PWD (Building) ka sorkar jylla ïa ka jingtei ïa ka Iingdorbar thawaiñ bathymmai ka jylla katkum ka jingtip kaba la ïoh lyngba ka jubab RTI kaba la pan na ka ophis u Chief Engineer ka PWD (Building).
Haba kren sha ki lad pathai khubor u General Secretary u Bah Roykupar Synrem u la ong ha ka jingshisha ïa kane ka Iingdorbar Thawaiñ dei ka Meghalaya Legislative Assembly kaba long trai ïa kaba ka tnad PWD (Building) ka dei tang ka nongpeit bad nongpynïaid ïa ka jingtrei hynrei ka tnad PWD (Building) ka ïaid lait na ka Iingdorbar bad ïa ka ophis u Lamphang ha kiba bun ki khep kiba ka la shim rai ban trei ïa kane ka Iingdorbar.
Katkum ka Tender kaba la khot ha ka 6 tarik, Nailur 2018 ha ka dor kaba la mang T. 1,05,58,65,500 klur bad la ai por ban pyndep hapoh lai snem bad hadien ba ka High Powered Committee (HPC) ba la khlieh da u Lamphang ka Ïingdorbar ka la shong ïa ka jingïalang ha ka 21tarik, Rymphang 2019 ka la pdïang ïa ka jingtyrwa jong ka tnad PWD Building Departmental Tender Committee ba napdeng saw tylli ki kompeni kiba thep ïa ka tender dei tang ka Uttar Pradesh Rajkiya Nirman Nigam Limited (UPRKMNL) kaba bïang ki buit bad ki jinglah ban pyntrei ïa kane ka jingtei ïa ka ïingdorbar ha ka jingïakop ba la pynlong ha ka 22 tarik, Kyllalyngkot, 2019 bad ka HPC ka la aiti beit sha u Chief Engineer ka tnad PWD Building ba kan shim ki sienjam ban pyndep ïa ki kam pisa tyngka ïa kane ka kompeni, la ïathuh u Bah Roykupar.
U Bah Roykupar u la ïathuh ruh ba ka HPC ka la shong jingïalang bïang ha ka 28 tarik, Rymphang, 2019 bad u Chief Engineer ka PWD Building u la ïathuh ba kane ka kompeni ka buh dor ban pyntrei ïa kane ka ïingdorbar ha ka jinglut kaba T. 1,27,75,98,456 klur kaba tam haduh kumba 21 % na kaba la mang. Hynrei ka HPC ka la pdïang ïa kane ka jingtyrwa jong kane ka kompeni na ka daw ba ka dor ba la mang ka dei naduh u snem 2015-16 katba kane ka kompeni pat ka buh ïa ka dor ka dor ka mur jong u snem 2018-19 bad ha ka kyndon jong ka Genral Clause of Contract ka ong ba yn ym don shuh kano kano ka jingkyntiew dor hadien ba la aiti ïa ka Letter of Award (LoA).
“Hynrei kaba pynlyngngoh ïa ngi na ka jingtip kaba ngi ïoh na ka ophis u Executive Engineer PWD Building Shillong Division ba ka don pynban ka jingkyntiew dor shuh shuh na kaba la mang sha ka T. 177 klur tam khlem ka jingtip jong ka ophis u Lamphang bad ka HPC. Kaba sngew thamula ka long ba ka ophis u Executive Engineer, Shillong Division ba ka dor ba la mynjur da ka HPC ka dei T. 141 klur katba ha ka Proceedings ka HPC la lap ba ka dor ba la pdïang ka dei T. 127 klur tam,” u la ong.
Shuh shuh u la ong ruh ba kane ka jingkyntiew na ka dor kaba la pdïang da ka HPC da T. 50 klur tam la leh beit da ka ophis jong u Executive Engineer u Bah Ransom Sutnga katba ha ka jingshisha ka bor jong kane ka ophis ka dei ban kyntiew dor ym palat ïa ka T. 7 lak.
Ha kaba ïadei bad kane ka jingpynkiew palat ïa ka dor ba la mynjur da ka HPC la aidaw ba dei namar ba ki pynmih thymmai ïa ka kamra ba sha khrum (Basement) kaba kane ruh ha ka jingshisha kam shym la don satïa ha ka Detailed Project Report (DPR), ong u Bah Roykupar.
“Lada ha ka DPR kam don kumno lah ban pynkha thymmai namar lada leh kumta hap pynkhreh da ka DPR kaba thymmai,” u la bynrap.
Ka HYC ka la pynpaw ruh ïa ka jingsngew artatien ba kane ka jingleh jong ka tnad PWD Building ka dei ban pynmyntoi ïa ki katto katne bad da ka jingïadon kti lang naduh u Myntri Rangbah ka jylla uba bat ïa ka tnad Pla Tyngka, u Myntri ka tnad PWD Building bad u Executive Engineer.
U Bah Roykupar u la ong dei ynda ka seng ka pynshong nongrim na kaei kaba la lap na ka RTI ka la dawa na u Lamphang ba un aiti noh ïa ka jingtohkit ïa kane ka kam sha ka CBI.
Haba ïadei pat bad ka jingtohkit kaba ka HPC ka la aiti sha IIT Guwahati ha kaba ïadei bad ka jingkhyllem jong u Dome, u Bah Roykupar u la ong, “ka jingtohkit jong ka IIT Guwahati ka dei beit thik tang ïa ka jingkhyllem u Dome bad ban ïit la ki bynta bym pat khyllem ki dang long neem kiba skhem hynrei kan ym tohkit satïa ha kaba ïadei bad kane ka na kata ka daw ka dei ban aiti beit sha ka CBI ban tohkit ïa kine pat ki jyrwit jyrwat.”
U la ong ba kat haduh mynta na ka lïang jong ka Sorkar ka la pyllait ïa ka pisa sha ka kompeni kumba T. 160 klur tam.