Nongstoiñ, Risaw, 17: U R.G.Momin MLA ka Rambrai Jyrngam Constituency ha ka sngi palei u la ïoh ban plie paidbah ïa ka Thiepkseh Sub Center kawei na ki shnong kaba don ha ka thaiñ Rambrai.
Na ka liang u MLA kum u kongsan ha katei ka sngi u la ïoh ban plie pyrda ïa u Mawsahnam jong katei ka jaka sumar nongpang bad khap ruh ïa u ribbon kum ka dak jong ka jingplie.
Ïa katei ka jingïalang la pynlong ha phyllaw katei ka jaka sumar nongpang bad la pynïaid ïa ka jingïalang da u bah L.Thongni kum u shongknor katei sngi, ha ka jingïasynranlang ruh da u bah E.Lyngdoh (McS), ka Dr Meribha L.Sohliya DMHO ka West Khasi Hills District kum ki symbud kongsan.
La ong ba ïa katei ka Thiepkseh Sub Center la tei lyngba ka jingbei pisa na ka scheme jong ka PM-ABHIM ha ka jinglut kaba la kot sha ki 55 lakh tam ei ei. Katba ïa katei ka jaka la ai ei ai sngewbha da ka kong Twelina Thongni.
Ka jingïoh ïa katei ka Sub Center ka long ka jingmyntoi haduh kumba phra tylli ki shnong ha kaba ki paid nongshong shnong jong katei ka thaiñ, nangne shakhmat kin ym donkam shuh ban leit phah sumar jingpang shaduh ïew Rambrai.
Lah ban kdew hangne ba ka Thiepkseh HWC ha ryngkat bad ka Wahlyngdoh HWC, ki dei ki ar tylli ki Sub Centre ba la pynïaid da ka The Hans Foundation (THF) ha West Khasi Hills District bad kane ka THF, ka la thung ïa ki nongtrei ha kine ki Centre bad ka la pynbiang ruh ïa ki ba bun ki tiar ha kine ki jaka sumar.
U kongsan u la pynpaw ka jingkmen kaba khraw bad ngeit skhem ruh ba lyngba kane ka Sub Centre, kaba ki paidbah ki ju ap khmih lynti baroh shikatta, kan long shisha ka jingkyrkhu na ka bynta jong baroh.
