Shillong, Risaw 17: Ka kynhun rwai ba pawnam na England ka ‘BLUE’ ka la pynkhreh mynta ban wan pynlyng-uh ha Nongbah Shillong ha ka 11 tarik u Nohprah, ha kaba kane kan dei ka sien kaba nyngkong eh jong ka jingwan ban rwai ha ri India.
Kane ka 25th Anniversary World Tour jong kane ka kynhun, ka la pynkhreh ruh ban wan rwai ha ki 2 tylli kiwei pat ki nongbah ba kynthup ïa ka Gangtok ha ka 13 tarik u Nohprah bad Bangalore ha ka 14 tarik u Nohprah.
Ka jingwan tour jong kane ka kynhun rwai kan sdang shwa na Shillong, kaba dei ka Rock Capital ka ri India. Ïa kane ka concert yn pynlong bad pynïaid da ka Fukra, kaba dei ka kompeni pynbyrñia kaba na Assam.
Lah ban pynkynmaw ba ha u snem 2023 la pynbna ba kane ka kynhun ‘BLUE’ kan wan sha Shillong, kham hadien pat la buhteng noh, hynrei ha kane ka kynti kaba mynta kane ka kynhun kan wan ban rwai pat ha une u snem ha nongbah Shillong bad kiwei ki nongbah ka thaiñ shatei lammihngi. Kane ka band kaba la pynap la slem ba kan wanphai, ka la pynkhreh mynta ban wan ha ryngkat bad ki rukom pyrkhat kiba pura bad ki jingshna ïa ka rynsan kaba biang bha.
Ha kane ka concert la khmih lynti ba kan khring ïa ki riew ieid jingrwai na kylleng ki jylla kane ka thaiñ shatei lammihngi ka ban long ruh kum kawei na ki pop concert ha ka pyrthei ka ban sah kynmaw ïa ki riew ieid jingrwai kane ka thaiñ.
