Shim por da ki snem ban ïoh jingïarap ki lanot shah pynjot mariang

Shillong, Naitung 01: La jan shi bnai ba ki bor ka mariang ki la lynshop ïa ki paidbah ha ka jylla, hynrei kiba bun ki dang sahkut sah ha ka jingmut ka jingpyrkhat ïa kaei kaba la jia ha ki ïing ki sem jong ki, naduh ka 13 tarik u Jymmang mynta u snem.
Lah ban kdew ba naduh u bnai Jymmang ter ter bad haduh u bnai Jylliew, da ki hajar tylli ki la shah lynshop na ka jingther u slap kaba la wanrah ka jingshlei um bad ka jingtwa khyndew bad shah pynjulor ruh ki ïing ki sem. Ki la don ruh haduh 35 ngut ki mynsiem kiba kordor kiba la duh noh na kane ka jingjia ka jingwan lynshop ki bor ka mariang.
Hynrei wat haba u slap u la sdang ban rang bad ka sngi ka la mih ban shat phyrnai, na ka bynta jong kine ki longïing pat u lyoh badum u dang kah ïa ka ïing ka sem jong ki.
Haba la ïoh ban ïakren bad kiba bun ki longïing kiba la twa khyndew bad pra ka ïing jong ki namar ka jingjur slap, ki la ïathuh ba haduh mynta kim pat ïoh jingïarap ei ei ruh na ka liang ki bor sorkar. “Ka ïing jong ngi, kam long shuh ban sah, namar ka khyndew ka la twa bad rung sha ïing bad ki kamra ki la pra lut, hynrei ngim pat ïoh jingïarap eiei ruh”, la ong iwei i longkmie. Ine i longkmie ba don 7 ngut ki khun, saw ngut kiba dang rit, i la ïathuh ba mynta i hap sah shipor bad kiba haïing hasem, namar ym pat ïoh lad ban shna ïa ka ïing. I la ïathuh ba na ka liang jong i, im pat ïoh lad ban shna ïa ka ïing namar ka jingduk, ha kaba u kpa ruh u la khlad noh san snem mynshuwa bad i pyndap ïa ka ïing ka sem da kaba die sha.
Ym tang kane ka longïing kaba mad bad sngewthuh haduh katno ka jingjynjar na kane ka jingwan lynshop ki bor ka mariang, hynrei ki don bun kiwei pat kiba don la ki jong ki khana ïa ki jingjia ba sngewtriem kiba la jia ha kine ki sngi ba jur u slap.
Kawei ka longïing ka la ïathuh ba ka la duh lut ïa ka jingdon jingem baroh, lait noh tang ki katto katne ki ki jingdonkam, namar ba ka khyndew kala pynpra lut ïa ka ïing jong ki. Kin ruh ki la hap ban shu shaniah ha ka jingleh isynei lem kiba haïing ban ïashong ïasah lang katba ngiam ei.
Haba la ïoh ban ïakren bad ki ophisar kiba dei peit ïa ki lad jingïarap na ka bynta ki longïing kiba mad ïa kaba kum kane ka apot lynshop ka mariang, ki la ïathuh ba ka jingtreikam ka long kaba jrong bad kyllaiñ bha bad kam dei kaba suk ruh ïa ki ba kin shu ai beit da ka pisa, wat haba ïohi ba ka ïing ka sem ka la jot ka la pra.
“Ngi hap ban bud ïa ki kyndon jong ka sorkar ba la buh lyngba ka Disaster Management Act, kaba la buh ryntih kumno ban ïarap ïa ki longïing kiba kum kine bad kane ka treikam bad ïa kata kaba ki ong ka immediate relief ruh”, la ong uwei u ophisar.
Na kane ka jingïathuh ki ophisar la sngewthuh ba haba jia ki jinglynshop ne ki jingpynjot ki bor ka mariang, ha ki jaka nongkyndong, kadei ka kamram jong ki nongïalam shnong ban pyntip sha ophis jong ka C&RD Block hapoh 24 kynta, ha kaba na ka liang ka Block kan buh ne ujor ïa ka FIR. Hadien kata u wan u Gramsevak u ban jurip ïakine ki jingjulor bad ban shim jingkheiñ ïa ka jingduh bad ka jingjulor. Na ka liang u Gramsevak bad ka Block ki pynkhreh ïa ka report ne ka assessment ban phah sha ki bor District bad na ki District pat sha ka sorkar jylla. “Hooid ka long kaba jingtreikam kaba jrong, hynrei ngim banse ban hap ïaid katkum ki kyndon”, la ong uwei u Gramsevak.
Ynda la poi ha ka sorkar jylla ka tnad Revenue bad Disaster Management pat ki hap shong pyrkhar ban jurip bad peit ïa ki report kiba wan na kylleng ki jaka jong ka jylla kiba ïakynduh ïa ka jingshah kynshop ha ki bor mariang.
Haba u nongthoh khubor u la wad bha ïa ki lad jingïarap na ki bor sorkar sha ki lanot ba shah pynjot ki ïing ki sem, la lap ba ka jingïarap ka wan hadien shisnem tam lane haduh arsnem. La lap ruh ba ka jingmang ka sorkar kam dei pura ïa kaei kaba ka ïing ka duh, hynrei ka long tang ka jingïarap ban ïasnoh ktilang bad kaei kaba ki paidbah ki duh. Ki trai ïing kiba la ïoh ïa kine ki jingïarap ki la ïathuh ba lada ïap uwei u syiar ka sorkar ka ai jingïarap 50 tyngka. Uwei u blang 100 tyngka.
Shuh shuh ki ophisar ki la ïathuh ba ha kaba ïadei bad ka jingtwa jong ki ïing ki sem, kaei kaba ka sorkar ka leh ka long ba lada don ki ïing kiba ym don ba haïing hasem, ka sorkar ka ïarap ka ïarap ban shna ïa ka temporary relief camp ba kin shong kin sah bad ka ïarap tang ki marbam, kum u khaw, u dai bad kiwei kiwei ki marbam.
Shuh shuh la lap na ka kane ka jingwad bniah, ba lada don ka jingtwa khyndew ïa ki ïing, hynrei lada kam don ka jingpra ha ka kynroh ne kano kano ka bynta jong ka ïing, wat haba u maw ne ka khyndew ka la shei ïa ka ïing, ïa kiba kum kine ruh ym kynthup ha ka jingiarap.
Ha kaba ïadei bad ka jingduh ki jingthung jingtep pat, la lap ba haba duh ki jingthung jingtep namar ka jingjur slap ne jingshlei um ne jingtwa khyndew, ki nongrep ki hap ban shon dur ha jaka rep ryngkat bad u jingthung uba la duh. Hadien kane kan sa don ka jingshim jingkheiñ kaba bniah kum ka jingheh ka jaka rep, ka jingheh ka jaka rep ba shah pynduh ha ka mariang, ka jinglut ne ka jingduh u jingthung. Nangta pat hap kheiñ antad lypa katno kilo u duh bad katno pat ka dor. Kaba bud nangne ka long ban leit rah ïa kine ki jingdonkam sha kano kano ka tnad ne ophis ka rep ka riang kaba don hajan. Ka jingïarap ka slem hi kumba slem ki ïing ki sem kata hadien shi snem ne shi snem tam bad ka jingïarap ruh kam long kaba bun.