Gandhinagar, Risaw 16 : Khyndiat kynta shwa ka jingpynheh ïa ka Kynhun Myntri jong ka sorkar Gujarat, baroh 16 ngut ki Myntri sorkar ka jylla lait noh u Myntri Rangbah Bhupendra Patel, ki la resain noh na ka shuki ba ki bat ha kane ka sngi Palei, ong ki thymmei khubor na ka party.
U Myntri Rangbah un pynheh noh ïa ka kynhun myntri jong u mynta ka sngi Thohdieng, pynbna ka sorkar jylla ha ka sngi Palei.
“Ka jingresain jong baroh 16 ngut ki Myntri ka dei ka kam kaba la leh da ka jingtip jong ka party. Lait noh u Myntri Rangbah Bhupendra Patel, baroh ki Myntri sorkar ki la resain lut,” bynrap shuh shuh ki thymmei khubor.
Katkum ka khubor ba la pyllait, ka jingpynheh ïa ka jingdon ki myntri sorkar ha ka jylla kan long ha ka por 11.30 baje mynta ka sngi Thohdieng.
Haduh mynta hi ka jingdon ki myntri sorkar ha katei ka jylla ka long 17 ngut kynthup lang ïa u CM Patel. Phra ngut ki bat kum ki Myntri ba pura katba kiwei pat ki bat kum ki Myntri Khynnah ne ki Minister of State.
Ka Gujarat kaba don hdauh 182 ngut ki MLA ha Iing Dorbar Thawain ka jylla, ka lah ban don haduh 27 ngut ki Myntri kaba long 15 persen na ka jingdon ki MLA hapoh Iing Dorbar.
Dang shen mynta u bnai, u MoS Jagdish Vishwakarma u la shimti kum u President ba thymmai jong ka state Bharatiya Janata Party unit, da kaba mih bujli ha ka jaka jong u CR Paatil uba dei ruh u Myntri ka sorkar pdeng.
Lah ban pynkynmaw hangne ba ka dei ka samoi kaba ar ïa u Bhupenda Patel ban bat ïa ka shuki Myntri Rangbah naduh ka 12tarik Nohprah, 2022.
